Rajya Sabha Election: સ્વાતિ માલિવાલને રાજ્યસભામાં મોકલશે AAP, જાણો બેઠકમાં કયા-કયા નામોને મળી મંજૂરી

Politics News: આમ આદમી પાર્ટીએ દિલ્હી મહિલા આયોગના વર્તમાન અધ્યક્ષ સ્વાતિ માલીવાલને રાજ્યસભામાં મોકલવાનો નિર્ણય કર્યો છે. આવી સ્થિતિમાં સ્વાતિ માલીવાલ પ્રથમ વખત રાજ્યસભાના સભ્ય બનશે. આ સિવાય આમ આદમી પાર્ટીએ તેના વર્તમાન રાજ્યસભા સાંસદ એનડી ગુપ્તાને ફરીથી રાજ્યસભામાં મોકલવાનો નિર્ણય કર્યો છે. પાર્ટી તરફથી સંજય સિંહને પણ ફરીથી રાજ્યસભામાં મોકલવામાં આવશે. આમ આદમી પાર્ટીની રાજકીય બાબતોની સમિતિ (Political Affairs Committee)એ આ નિર્ણયને મંજૂરી આપી દીધી છે. સંજય સિંહ હાલમાં દિલ્હી દારૂ કૌભાંડ કેસમાં જેલમાં છે.

ત્રણેય બેઠકો પર AAPને બહુમતી

દિલ્હીથી રાજ્યસભાની ત્રણ બેઠકો માટે ચૂંટણી યોજાવાની છે. માનવામાં આવી રહ્યું છે કે આ વખતે પણ ત્રણેય સીટો આમ આદમી પાર્ટીના નામે થઈ શકે છે. તેનું કારણ એ છે કે વિધાનસભાની 70 બેઠકોમાંથી 62 બેઠકો પર આમ આદમી પાર્ટીના ધારાસભ્યો છે. આઠ બેઠકો પર ભાજપના ધારાસભ્યો છે. આવી સ્થિતિમાં ત્રણેય બેઠકો પર મોટી બહુમતીને કારણે આમ આદમી પાર્ટીના ત્રણેય ઉમેદવારો રાજ્યસભા માટે જીતી શકે છે. દિલ્હી ચૂંટણી પંચ દ્વારા રાજ્યસભાની ચૂંટણીની તૈયારીઓ શરૂ કરી દેવામાં આવી છે. આ ચૂંટણી 19 જાન્યુઆરીએ યોજાવાની છે. આ દિવસે જ ચૂંટણીના પરિણામો પણ જાહેર કરવામાં આવશે.

ચૂંટણી નોમિનેશન પ્રક્રિયા શરૂ

રાજ્યસભાની ચૂંટણી માટે નોમિનેશનની પ્રક્રિયા શરૂ થઈ ચૂકી છે. ત્રણેય સીટો માટે ઉમેદવારો 9 જાન્યુઆરી સુધી ઉમેદવારી પત્રો ભરી શકશે. 10 જાન્યુઆરીએ ઉમેદવારી પત્રોની ચકાસણી કરવામાં આવશે. નામો પરત ખેંચવાની છેલ્લી તારીખ 12 જાન્યુઆરી નક્કી કરવામાં આવી છે. 19 જુલાઈના રોજ સવારે 9થી સાંજના 5 વાગ્યા સુધી મતદાન થશે.

સંજય સિંહને નામાંકન માટેની પરવાનગી

દિલ્હીની એક અદાલતે જેલમાં બંધ આમ આદમી પાર્ટીના સાંસદ સંજય સિંહને રાજ્યસભા માટે ફરીથી નોમિનેશન માટેના ફોર્મ અને દસ્તાવેજો પર સહી કરવાની પરવાનગી આપી છે. રાજ્યસભાના સભ્ય તરીકે સંજય સિંહનો વર્તમાન કાર્યકાળ 27 જાન્યુઆરીએ પૂરો થાય છે.