રાહુલ ગાંધી વડાપ્રધાન બન્યા તો શું કરશે? તેમણે જણાવ્યા આ ત્રણ કામ..

દિલ્હીઃ કોંગ્રેસનાં નેતા રાહુલ ગાંધી અત્યારે ભારત જોડો યાત્રા કરી રહ્યા છે. તેઓ સતત જાહેર સભાઓ અને મીડિયાને પણ સંબોધિત કરી રહ્યા છે. આ દરમિયાન રાહુલ ખૂબ જ કંપોઝ્ડ લાગે છે અને દરેક સવાલના જવાબ ખૂબ જ ઝીણવટથી આપી રહ્યા છે. શનિવારે પણ તેમણે કોંગ્રેસ મુખ્યાલયમાં મીડિયાને સંબોધન કર્યું હતું. આ દરમિયાન તેમણે પત્રકારોના સવાલોના જવાબ આપ્યા હતા.

જોકે, એક પ્રશ્ન સાંભળતા જ રાહુલ ગાંધીને આશ્ચર્ય થયું અને તેમણે ખૂબ જ વિનમ્રતાથી અને સમજદારીપૂર્વક જવાબ આપ્યો હતો. વાસ્તવમાં, રાહુલ ગાંધીને પૂછવામાં આવ્યું હતું કે જો તેઓ દેશના વડાપ્રધાન બને છે, તો તેઓ પ્રથમ ત્રણ કઈ બાબતો પર કામ કરશે? આવો જાણીએ રાહુલ ગાંધીએ શું આપ્યો જવાબ…

1. બાળકોને વિઝન આપશે
રાહુલ ગાંધીએ કહ્યું, સૌથી પહેલા હું દેશમાં શિક્ષણનું માળખું બનાવવા માંગુ છું. આપણી શિક્ષણ વ્યવસ્થા યોગ્ય રીતે કામ કરી રહી નથી. તે બાળકોને બિલકુલ ભવિષ્યનું વિઝન આપી શકતી નથી. તેમણે કહ્યું, ભારત જોડો યાત્રા દરમિયાન મેં હજારો બાળકો સાથે વાત કરી. બધાએ પૂછ્યું કે તમે કોલેજ પૂરી કરીને શું કરવા માંગો છો? મને માત્ર પાંચ જ જવાબો મળ્યા – ડોક્ટર, વકીલ, એન્જિનિયર, પાઈલોટ, IAS. રાહુલે કહ્યું કે, 99.9 ટકા બાળકો આ જ જવાબ આપી રહ્યા છે. એટલે કે, આપણી શિક્ષણ પ્રણાલી તે બાળકોને કહે છે કે તમે આ પાંચ વસ્તુઓ સિવાય બીજું કંઈ કરી શકતા નથી.

2. કૌશલ્ય વિના રોજગાર નહીં
રાહુલ ગાંધીએ કહ્યું, અમે કૌશલ્યનું સન્માન કર્યા વિના યુવાનોને રોજગાર આપી શકીએ નહીં. પછી તે ગમે તે હોય. હાલમાં, સ્થિતિ એવી છે કે જેમની પાસે સ્કિલ છે તેમને કોઈ મદદ કરતું નથી. આગળ વધવાનું વિઝન આપી શકતું નથી.

3. વિદેશ નીતિ મૂંઝવી રહી છે
રાહુલ ગાંધીએ કહ્યું, આપણે દેશમાં ભાઈચારો, એકતા અને પ્રેમની લાગણી ફેલાવવાની છે. તેની અસર દેશની સરહદો પર પણ પડે છે. દેશમાં હિંસા અને નફરતની અસર બીજા દેશો જુએ છે અને તેનો ફાયદો ઉઠાવે છે. આપણી વિદેશ નીતિ ઘણી ગૂંચવણભરી છે. તે આપણને જબરદસ્ત નુકસાન કરશે. હું કોરોના સમયે પણ એવું જ કહેતો હતો.