આ દેશમાં છે હિન્દુ દેવી દેવતાની તસવીર વાળી કરન્સી, મુસ્લિમ દેશો પણ સામેલ

નવી દિલ્હી: દિલ્હીના મુખ્યમંત્રી અરવિંદ કેજરીવાલે ભારતીય ચલણી નોટો પર મહાત્મા ગાંધી સાથે લક્ષ્મી-ગણેશનો ફોટો છાપવાની અપીલ કરી છે. તેમણે કહ્યું કે આમ કરવાથી આખા દેશને આ દેવતાઓના આશીર્વાદ મળશે. તેમણે કહ્યું કે દેવી લક્ષ્મીને સમૃદ્ધિની દેવી માનવામાં આવે છે જ્યારે ભગવાન ગણેશ તમામ અવરોધો દૂર કરે છે. તેથી નોટ પર બંનેની તસવીર છાપવી જોઈએ. તેનાથી દેશની અર્થવ્યવસ્થા સુધરશે. હાલમાં ભારતમાં ચલણી નોટો પર મહાત્મા ગાંધી અને દેશના જોવાલાયક સ્થળોની તસવીર છપાય છે. ત્યારે દુનિયાના એવા ઘણા દેશ છે જ્યાં ચલણ પર હિંદુ દેવી-દેવતાઓની તસવીરો છપાયેલી છે.

87 ટકા મુસ્લિમ વસ્તી ધરાવતા દેશમાં ગણેશજીની તસવીર
ઇન્ડોનેશિયા વિશ્વનો એકમાત્ર એવો દેશ છે જેની ચલણી નોટો પર ભગવાન ગણેશનું ચિત્ર છે. અહીં 87.5% વસ્તી મુસ્લિમ છે અને 1.7% વસ્તી હિન્દુ છે. અહીં 20,000 રૂપિયાની નોટ પર ભગવાન ગણેશની તસવીર છપાયેલી છે. વિશ્વમાં સૌથી વધુ મુસ્લિમ વસ્તી ધરાવતો દેશ છે. નોંધનીય છે કે ઇન્ડોનેશિયામાં હિંદુ દેવતાઓ અને પ્રતીકોનો ઉપયોગ સામાન્ય છે કારણ કે શરૂઆતની સદીઓમાં ઇન્ડોનેશિયા હિંદુ ધર્મથી ખૂબ પ્રભાવિત હતું. આ દેશમાં સ્થિત વિવિધ મંદિરો, શિલ્પોમાં જોઈ શકાય છે.

થાઈલેન્ડની કરન્સી પર ત્રિમૂર્તિ
થાઈલેન્ડના નેશનલ ઈકોનોમિક એન્ડ સોશિયલ ડેવલપમેન્ટ બોર્ડે તેમના 60 માં સ્થાપન દિવસે 2011માં 20 બહ્ટનો સિક્કો જાહેર કર્યો હતો. આ સિક્કાની એક બાજુ ત્રિમૂર્તિ એટલે કે બ્રહ્મા, વિષ્ણુ અને મહેશનું ચિત્ર કોતરેલું હતું.

સંયુક્ત રાજ્ય અમેરિકામાં વર્ષ 2001 માં મહર્ષિ મહેશ યોગી સાથે જોડાયેલા એક એનજીઓ ધ ગ્લોબલ કન્ટ્રી ઓફ વર્લ્ડ પીસ (GCWP)એ રાજા રામ મુદ્રાને લોન્ચ કર્યા હતા. જો કે, તેનો ઉપયોગ આશ્રમની અંદર અથવા આશ્રમ સાથે સંકળાયેલા સભ્યોમાં જ કરવામાં આવતો હતો. 24 ફેબ્રુઆરી 2002ના રોજ વૈદિક સિટીએ રામ મુદ્રાનું વિતરણ શરૂ કર્યું. થોડા સમય પછી સિટી કાઉન્સિલે રામ મુદ્રાની પ્રથા સ્વીકારી અને 1 રામ મુદ્રાની કિંમત 10 અમેરિકન ડોલર નક્કી કરવામાં આવી. યુરોપમાં 1 રામ ચલણની કિંમત 10 યુરો જેટલી હતી. વર્ષ 2003 સુધીમાં નેધરલેન્ડના લગભગ 100 દુકાનો, 30 ગામો અને નજીકના શહેરોમાં રામ મુદ્રાની પ્રથા શરૂ થઈ. તે રાજ્યમાં દરેક જગ્યાએ સ્વીકારી શકાય નહીં અને તે માત્ર સ્થાનિક ચલણ છે. અમેરિકા અને નેધરલેન્ડની સેન્ટ્રલ બેંકોએ તેને કાનૂની ટેન્ડર માન્યું ન હતું.