Neeraj Chopra Wins Doha Diamond league: નીરજ ચોપરાએ વર્લ્ડ ચેમ્પિયન એંડરસન પીટર્સને પછાડી મેળવી જીત

દોહાઃ ભારતના સ્ટાર જેવલિન થ્રોઅર નીરજ ચોપરાએ નવી સિઝનની શાનદાર શરૂઆત કરી છે. નીરજ ચોપરાએ 5મી મે (શુક્રવાર)ના રોજ દોહા ડાયમંડ લીગનું ટાઇટલ જીત્યું. દોહાના કતાર સ્પોર્ટ્સ ક્લબમાં આયોજિત સ્પર્ધામાં નીરજે પ્રથમ પ્રયાસમાં જ 88.67 મીટર ભાલો ફેંક્યો હતો. નીરજનો આ પહેલો થ્રો સ્પર્ધાનો સર્વશ્રેષ્ઠ થ્રો હતો. જો કે ફરી એકવાર નીરજ 90 મીટરનો અવરોધ પાર કરવામાં સફળ થઈ શક્યો ન હતો.

ટોક્યો ઓલિમ્પિકમાં સિલ્વર મેડલ જીતનાર ચેક ખેલાડી જેકોબ વાડલેજ બીજા ક્રમે રહ્યો હતો. ગ્રેનાડાના એન્ડરસન પીટર્સ ત્રીજા સ્થાને છે. ગયા વર્ષની વર્લ્ડ ચેમ્પિયનશિપમાં એન્ડરસન પીટર્સે નીરજ ચોપરાને હરાવીને ગોલ્ડ જીત્યો હતો. હવે આ જીત સાથે નીરજ ચોપરાએ પીટર્સ પાસેથી પાછલી હારનો બદલો લઈ લીધો છે.

દોહા ડાયમંડ લીગ ફાઇનલ સ્ટેન્ડિંગ્સ
1. નીરજ ચોપરા (ભારત) – 88.67 મી
2. જેકબ વડલેજચ (ચેક રિપબ્લિક) – 88.63 મી
3. એન્ડરસન પીટર્સ (ગ્રેનાડા) – 85.88 મી
4. જુલિયન વેબર (જર્મની) – 82.62 મી
5. એન્ડ્રીયન માર્ડારે (મોલ્ડોવા) – 81.67 મી
6. કીશોર્ન વોલકોટ (ટ્રિનિદાદ અને ટોબેગો) – 81.27 મી.
7. રોડરિક જી. ડીન (જાપાન) – 79.44 મી
8. કર્ટિસ થોમ્પસન (યુએસએ) – 74.13 મી

ડાયમંડ લીગની ફાઈનલ જીનમાં યોજાશે
દોહામાં યોજાઈ રહેલી આ ઈવેન્ટ ડાયમંડ લીગ સિરીઝનો પ્રથમ તબક્કો છે. તે 16 અને 17 સપ્ટેમ્બરના રોજ યુજેનમાં ડાયમંડ લીગ ફાઇનલ્સ સાથે સમાપ્ત થવાનું છે. દરેક રમતવીરને ડાયમંડ લીગના એક લેગમાં પ્રથમ સ્થાન માટે 8, બીજા માટે 7, ત્રીજા માટે 6 અને ચોથા સ્થાન માટે 5 પોઈન્ટ આપવામાં આવે છે.

નીરજ વર્તમાન ડાયમંડ લીગ ચેમ્પિયન
નીરજનું વ્યક્તિગત સર્વશ્રેષ્ઠ પ્રદર્શન 89.94 મીટર છે, જે એક રાષ્ટ્રીય રેકોર્ડ પણ છે. તેણે 2018માં દોહા ડાયમંડ લીગમાં તેની એકમાત્ર સહભાગિતામાં 2018માં 87.43m સાથે ચોથું સ્થાન મેળવ્યું હતું. નીરજ ‘એકંદર ફિટનેસ અને સ્ટ્રેન્થ’ના અભાવે ગયા વર્ષે દોહા ડાયમંડ લીગ ચૂકી ગયો હતો. ગયા સપ્ટેમ્બરમાં ઝ્યુરિચમાં 2022 ગ્રાન્ડ ફિનાલે જીત્યા બાદ તે ડાયમંડ લીગ ચેમ્પિયન બનનાર પ્રથમ ભારતીય બન્યો હતો. એક મહિના અગાઉ, તે લૌઝેનમાં ડાયમંડ લીગ મીટ જીતનાર પ્રથમ ભારતીય બન્યો હતો.