છેલ્લી ઘડીનો પ્રચાર: આજે ખડગે કડીમાં, કેજરીવાલ સુરતમાં તો PM મોદી સૌરાષ્ટ્રમાં સભાઓ ગજવશે, જાણો કાર્યક્રમ

અમદાવાદ: ગુજરાતમાં વિધાનસભાની પ્રથમ તબક્કાની ચૂંટણીના ગણતરીના દિવસ બાકી છે. ત્યારે છેલ્લી ઘડીએ પણ તમામ રાજકીય પાર્ટીઓ પુરજોશમાં પ્રચાર કરી રહી છે. ચૂંટણીને લઈને આજે PM મોદી સતત બીજા દિવસે સભાઓ અને રેલીઓ કરશે તો દિલ્હીના મુખ્યમંત્રી અરવિંદ કેજરીવાલ પણ ગુજરાતમાં પ્રચાર કરશે. બીજી તરફ કોંગ્રેસના રાષ્ટ્રીય અધ્યક્ષ મલ્લીકાર્જુન ખડગે પણ પ્રચાર કરતા જોવા મળશે. ત્યારે આવો જાણીએ કયા નેતાઓ આજે ક્યાં પ્રચાર કરશે.

PM મોદીના આજના કાર્યક્રમ
PM મોદી આજે પણ ગુજરાતમાં ચાર જનસભાઓને સંબોધન કરશે. પહેલા તેઓ બપોરે 12.15 વાગ્યે પાલિતાણામાં સભા સંબોધશે. આ બાદ બપોરે 2.45 વાગ્યે અંજારમાં, સાંજે 4.30 વાગ્યે જામનગર અને 6.30 વાગ્યે રાજકોટમાં જનસભાને સંબોધન કરશે. બીજી તરફ કેન્દ્રિય ગૃહમંત્રી અમિત શાહ પણ આજે મહેસાણા, વડોદરા, અરવલ્લી, અને અમદાવાદમાં સભાઓ ગજવશે. જ્યારે કેન્દ્રિય મંત્રી સ્મૃતિ ઈરાની મહેસાણામાં મહિલા મોરચા સંમેલનમાં હાજરી આપશે અને બાદમાં ગાંધીનગર તથા અમદાવાદમાં જનસભાને સંબોધશે. બીજી તરફ બોલિવૂડ એક્ટર પરેશ રાવલ પણ આજે સાંજે 5 વાગ્યે વલસાડ, પછી સુરતમાં બે જનસભાને સંબોધશે.

કેજરીવાલ સુરતમાં કરશે પ્રચાર
દિલ્હીના મુખ્યમંત્રી અરવિંદ કેજરીવાલ પણ આજે ગુજરાતમાં છે. ગુજરાત પ્રવાસના ત્રીજા દિવસે આજે તેઓ સુરતમાં જ પોતાના તમામ કાર્યક્રમો કરશે. જેમાં સવારે 11 વાગ્યે સુરતમાં એક પ્રેસ કોન્ફરન્સને સંબોધશે. આ બાદ બપોરે 2.30 વાગ્યે સુરતમાં હીરા કારખાનાની મુલાકાત કરશે અને 3 વાગ્યે રત્નકલાકારોને સંબોધશે. આ બાદ તેઓ 5 વાગ્યે કતારગામમાં રોડ શો કરશે અને રાત્રે 9 વાગ્યે કિરણ ચોકમાં જાહેરસભાને સંબોધશે. જ્યારે ભગવંત માન વડોદરામાં ચૂંટણી પ્રચાર કરશે.

કોંગ્રેસના રાષ્ટ્રીય અધ્યક્ષે પણ પ્રચારનું કામ સંભાળ્યું
કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે પણ આજે ગુજરાતમાં છે. જ્યારે રાજસ્થાનના મુખ્યમંત્રી અશોક ગેહલોત પણ ચૂંટણી પ્રચારમાં છે. આજે સવારે 11 વાગ્યે તેઓ એક પ્રેસ કોન્ફરન્સને સંબોધશે. આ બાદ સાંજે 5 વાગ્યે મહેસાણાના કડીમાં જનસભાને સંબોધન કરશે અને રાત્રે 8 વાગ્યે અમદાવાદના બહેરામપુરામાં જનસભાને સંબોધન કરશે.