ભારતીય કંપનીઓ કર્મચારીઓની ખરાબ માનસિક સ્થિતિને કારણે દર વર્ષે 14 બિલિયન ડોલર ગુમાવે છે

દિલ્હીઃ કર્મચારીઓના ખરાબ માનસિક સ્વાસ્થ્ય, વારંવાર રજા લેવી, ઓછી ઉત્પાદકતા અને નોકરી ગુમાવવાને કારણે ભારતીય કંપનીઓ વાર્ષિક 14 બિલિયન ડોલર ગુમાવી રહી છે. ડેલોઈટના સર્વે અનુસાર, લગભગ 47 ટકા પ્રોફેશનલ્સે કર્મચારીઓના બગડતા માનસિક સ્વાસ્થ્ય પાછળ કાર્યસ્થળના તણાવને મુખ્ય કારણ ગણાવ્યું હતું. આ માટે નાણાકીય અને કોરોના સંબંધિત પડકારો પણ જવાબદાર છે.

સર્વેમાં જણાવાયું છે કે 80 ટકા ભારતીય કર્મચારીઓ છેલ્લા એક વર્ષથી માનસિક સ્વાસ્થ્ય સમસ્યાઓથી પીડિત છે. આમ છતાં, 39 ટકા અસરગ્રસ્ત લોકો સમાજમાં ચર્ચા થવાના ડરથી તેની સાથે વ્યવહાર કરવા માટે જરૂરી પગલાં લેતા નથી. તે વધુમાં જણાવે છે કે સર્વેમાં સામેલ 33 ટકા લોકો તેમની ખરાબ માનસિક સ્થિતિ હોવા છતાં કામ કરવાનું ચાલુ રાખે છે. 29 ટકાએ તેને દૂર કરવા માટે રજા લીધી, જ્યારે 20 ટકાએ રાજીનામું આપ્યું.

ભારતમાં વિશ્વના 15 ટકા માનસિક દર્દીઓ 
છેલ્લા કેટલાક વર્ષોમાં માનસિક સ્વાસ્થ્યની સમસ્યા વિશ્વભરમાં વધી છે. રોગચાળા સાથે તેમાં વધુ વધારો થયો છે. વર્લ્ડ હેલ્થ ઓર્ગેનાઈઝેશન અનુસાર વિશ્વના 15 ટકા માનસિક દર્દીઓ ભારતમાં છે. ડેલોઈટ ગ્લોબલના સીઈઓ પુનિત રંજને જણાવ્યું હતું કે, “માનસિક સ્વાસ્થ્ય એ એક વાસ્તવિક સમસ્યા છે. છેલ્લા બે વર્ષથી અમે કર્મચારીઓના માનસિક સ્વાસ્થ્ય પડકારો પર સંવાદ શરૂ કર્યો છે. અભ્યાસ મુજબ, કંપનીઓએ તેમના લોકોના માનસિક સ્વાસ્થ્ય અને સુખાકારીને પ્રાથમિકતા આપવી જોઈએ.