2022માં સ્વિસ બેંકોમાં ભારતીયોની જમા રકમમાં થયો ઘટાડો, જાણો હજુ કેટલા રૂપિયા છે જમા…

નવી દિલ્હી: ગત વર્ષ 2022માં સ્વિસ બેંકોમાં જમા ભારતીયો અને ભારતીય કંપનીઓના નાણામાં ઘટાડો થયો છે. એક વર્ષમાં તેમાં 11 ટકાનો ઘટાડો જોવા મળ્યો છે. ત્યારબાદ જમા રકમ 3.42 અબજ સ્વિસ ફ્રેંક (લગભગ 30,000 કરોડ રૂપિયા) રહી ગઈ છે. સ્વિટ્ઝર્લેન્ડની સેન્ટ્રલ બેંકે ગુરુવારે આ આંકડા જાહેર કર્યા છે. એવું બહાર આવ્યું છે કે ભારતીયો દ્વારા જમા કરવામાં આવેલી રકમમાં પણ લગભગ 34 ટકાનો ઘટાડો નોંધાયો છે.

આંકડાઓમાં કાળા નાણાંનો કોઈ ઉલ્લેખ નથી
જો તમે સ્વિસ નેશનલ બેંક (SNB) દ્વારા ગુરુવારે જાહેર કરાયેલા ડેટા પર નજર નાખો તો તેમાં ભારતીય ખાતાધારકો દ્વારા જમા કરાયેલા કથિત કાળા નાણાનો ઉલ્લેખ નથી. આ સિવાય ત્રીજા દેશની પેઢીના નામે સ્વિસ બેંકોમાં જમા રકમનો પણ સમાવેશ કરવામાં આવ્યો નથી. આ આંકડા વર્ષ 2022ના છે જ્યારે આના એક વર્ષ પહેલા વર્ષ 2021માં ભારતીય ગ્રાહકોએ સ્વિસ બેંકોમાં 3.83 સ્વિસ ફ્રેંકની રકમ રાખી હતી. આ રકમ છેલ્લા 14 વર્ષમાં સૌથી વધુ છે.

2021 ની સરખામણીમાં, જમા રકમમાં ઘટાડો થયો
SNB દ્વારા કહેવામાં આવ્યું છે કે ગયા વર્ષે સ્વિસ બેંકોમાં ભારતીયો દ્વારા જમા કરવામાં આવેલી રકમ પણ લગભગ 34 ટકા ઘટીને 394 મિલિયન ફ્રેંક થઈ ગઈ છે. જ્યારે 2021માં આ રકમ 602 મિલિયન ફ્રેંક નોંધાઈ હતી. સ્વિસ નેશનલ બેંકે આ તમામ આંકડા સ્વિત્ઝર્લેન્ડની બેંકો દ્વારા આપવામાં આવેલી માહિતી અને ડેટાના આધારે જાહેર કર્યા છે. બેંકોમાં કુલ થાપણોમાંથી 110 કરોડ ફ્રેંક અન્ય બેંકો દ્વારા સ્વિસ બેંકોમાં ટ્રાન્સફર કરવામાં આવ્યા હતા. આ ઉપરાંત, ટ્રસ્ટ દ્વારા 24 મિલિયન ફ્રેંક અને બોન્ડ, સિક્યોરિટીઝ તેમજ અન્ય નાણાકીય સાધનોના રૂપમાં 1896 મિલિયન ફ્રેંક બેંકો પાસે રાખવામાં આવ્યા હતા.

2006માં ડિપોઝિટ રેકોર્ડ સ્તરે હતી
રિપોર્ટ અનુસાર, વર્ષ 2006માં સ્વિસ બેંકોમાં ભારતીયોની કુલ રકમ 6.5 અબજ ફ્રેંક હતી, જે રેકોર્ડ સ્તર હતી. જો કે, ત્યારપછી વર્ષ 2011, 2013, 2017, 2020 અને 2021 સિવાય અન્ય વર્ષોમાં તેમાં ઘટાડો જોવા મળ્યો છે. ભારતીયોની આ સંપત્તિ આ બેંકોમાં ચાર ઘટકોમાં રાખવામાં આવી છે. જો છેલ્લા કેટલાક વર્ષોના ડેટા પર નજર કરીએ તો 2019માં ચારેય ઘટકોમાં ઘટાડો જોવા મળ્યો હતો. જ્યાં વર્ષ 2020માં ગ્રાહકોની જમા રકમમાં મોટો ઘટાડો નોંધાયો હતો, વર્ષ 2021ની વાત કરીએ તો 2021માં તમામ કેટેગરીમાં વધારો નોંધાયો હતો અને છેલ્લા વર્ષ 2022માં માત્ર જવાબદાર લોકો અને ટ્રસ્ટની કેટેગરીમાં વધારો થયો હતો.