DC vs RCB: સોલ્ટની તોફાની ઈનિંગ્સથી RCBની હાર, દિલ્હી કેપિટલ્સનો 7 વિકેટે વિજય

નવી દિલ્હી: IPL 2023ની બ્લોકબસ્ટર મેચમાં દિલ્હી કેપિટલ્સે રોયલ ચેલેન્જર્સ બેંગ્લોરને સાત વિકેટે હરાવ્યું. 6 મે (શનિવાર)ના રોજ અરુણ જેટલી સ્ટેડિયમમાં રમાયેલી મેચમાં RCBએ યજમાન ટીમને જીતવા માટે 182 રનનો ટાર્ગેટ આપ્યો હતો, જે તેણે 17મી ઓવરમાં હાંસલ કરી લીધો હતો. ઇંગ્લિશ બેટ્સમેન ફિલ સોલ્ટ દિલ્હી કેપિટલ્સની જીતનો હીરો હતો. ફિલ સોલ્ટે 87 રનની તોફાની ઇનિંગ રમી હતી. આ દરમિયાન સોલ્ટે 45 બોલનો સામનો કર્યો અને આઠ ચોગ્ગા ઉપરાંત છ છગ્ગા ફટકાર્યા.

દિલ્હીના બેટ્સમેનોની આખરે કમાલ
મોટા લક્ષ્યનો પીછો કરવા ઉતરેલી દિલ્હી કેપિટલ્સે તોફાની શરૂઆત કરી હતી. કેપ્ટન ડેવિડ વોર્નર અને ફિલ સોલ્ટે 31 બોલમાં 60 રનની ભાગીદારી નોંધાવી હતી. જોસ હેઝલવુડે વોર્નરની વિકેટ લઈને આ ખતરનાક ભાગીદારીનો અંત લાવ્યો હતો. વોર્નરે 14 બોલમાં 22 રન બનાવ્યા જેમાં ત્રણ ચોગ્ગા અને એક છગ્ગાનો સમાવેશ થાય છે. ડેવિડ વોર્નરના આઉટ થયા બાદ પણ આરસીબીની મુશ્કેલીઓ ઓછી થઈ ન હતી. કારણ કે મિચેલ માર્શ અને ફિલ સોલ્ટે બીજી વિકેટ માટે 59 રનની મહત્વપૂર્ણ ભાગીદારી કરી હતી.

માર્શે 17 બોલમાં 26 રન બનાવ્યા હતા. માર્શ આઉટ થયો ત્યારે દિલ્હીનો સ્કોર 10.3 ઓવરમાં બે વિકેટે 119 રન હતો. માર્શના આઉટ થયા બાદ રાઈલી રુસોએ મોરચો સંભાળ્યો. રુસો અને સોલ્ટે 52 રનની પાર્ટનરશીપ કરી. જેના કારણે RCB સંપૂર્ણ રીતે મેચમાંથી બહાર થઈ ગયું. રુસોએ 22 બોલમાં અણનમ 35 રન બનાવ્યા હતા.

RCBએ ટોસ જીતને બેટિંગ લીધી પણ 182 રન ન બચાવી શકી
RCB ટોસ જીતીને પ્રથમ બેટિંગ કરવા ઉતરી અને તેણે શાનદાર શરૂઆત કરી. કેપ્ટન ફાફ ડુ પ્લેસિસ અને સ્ટાર બેટ્સમેન વિરાટ કોહલીએ 10.3 ઓવરમાં 82 રનની ભાગીદારી કરી હતી. મિશેલ માર્શે ફાફ ડુ પ્લેસિસને આઉટ કરીને આ ભાગીદારી તોડી હતી. ડુ પ્લેસિસે 32 બોલનો સામનો કર્યો અને 45 રન બનાવ્યા, જેમાં પાંચ ચોગ્ગા અને એક છગ્ગાનો સમાવેશ થાય છે. માર્શે તેના આગલા જ બોલ પર ગ્લેન મેક્સવેલની મોટી વિકેટ લીધી હતી.

બે વિકેટ પડ્યા બાદ કોહલી અને મહિપાલ લોમરોર વચ્ચે 55 રનની મહત્વની ભાગીદારી. કોહલીએ 46 બોલમાં 55 રન બનાવ્યા જેમાં પાંચ ચોગ્ગા સામેલ હતા. મુકેશ કુમારે કોહલીને ખલીલ અહેમદના હાથે કેચ આઉટ કરાવ્યો હતો. કોહલીએ આ ઈનિંગ દરમિયાન આઈપીએલમાં પોતાના સાત હજાર રન પણ પૂરા કર્યા. IPLમાં સાત હજાર રન બનાવનાર કોહલી પ્રથમ બેટ્સમેન છે.

કોહલીના આઉટ થયા બાદ મહિપાલ લોમરોરે તેના ખભા પર જવાબદારી લીધી હતી. લોમરોરે તેની IPL કારકિર્દીની પ્રથમ અડધી સદી ફટકારતા અણનમ 54 રન બનાવ્યા હતા. આ દરમિયાન લોમરોરે 29 બોલનો સામનો કર્યો અને છ ચોગ્ગા ઉપરાંત ત્રણ છગ્ગા ફટકાર્યા. લોમરોર-કોહલીની શાનદાર ઇનિંગ્સના કારણે આરસીબીની ટીમ ચાર વિકેટે 181 રન જ બનાવી શકી હતી.