યુવકોને છરી સાથે રીલ બનાવવી પડી ભારે, હવે ગણશે જેલના સળિયા

સંજય રાઠોડ, સુરત: સોશિયલ મીડિયા પર રીલ બનાવવાનો ક્રેઝ દિવસેને દિવસે વધી રહ્યો છે. સામાન્ય યુવક હોય કે યુવતી હોય કે પછી કોઈ ગુન્હેગાર હોય, રીલ બનાવનારાઓમાં કોઈ પાછળ નથી. ગુજરાતની સુરત પોલીસે આવા ત્રણ ગુનેગારોની ધરપકડ કરી છે જેઓ બાઇક પર બેસીને હવામાં છરીઓ ઉડાવીને રીલ બનાવવા માટે શહેરના રસ્તાઓ પર નીકળ્યા હતા. તેનો વીડિયો સોશિયલ મીડિયા પર વાયરલ થયા બાદ પોલીસે તેની ધરપકડ કરી હતી.

સોશિયલ મીડિયા પર વાયરલ થયેલા આ વીડિયોમાં ત્રણ યુવકો રાત્રિના અંધારામાં બાઇક પર સવાર થયા હતા જેમાં એક યુવક બાઇક ચલાવી રહ્યો છે જ્યારે તેની પાછળ અન્ય બે યુવકો હાથમાં ખાલી છરીઓ છે જેને તે હવામાં ઉડાવી રહ્યા હતા. થોડીવાર પછી બાઇક સવાર વ્યક્તિ પણ બાઇકનું હેન્ડલ છોડીને બાઇક પર ઉભો રહે છે અને તેની પાછળ એક પછી એક બંને યુવકો પણ ઉભા થઇને હાથમાં છરી લઈ આગળ વધે છે. આ ખતરનાક સ્ટંટનો વીડિયો સુરતના ઉધના પોલીસ સ્ટેશન વિસ્તારનો છે. આ બાઇક સવારો જે રીતે છરીઓ ઉડાવી રહ્યા હતા અને બાઇકનું હેન્ડલ છોડીને બાઇક ચલાવી રહ્યા હતા ત્યારે જો અકસ્માત થયો હોત તો ગંભીર પરિણામ આવ્યું હોત.

ગુનાહિત ઇતિહાસ
આ વીડિયો સોશિયલ મીડિયા પર વાયરલ થયા બાદ સુરતના ઉધના પોલીસ સ્ટેશન સફાળા જાગ્યું હતું અને તેમને પકડવા માટે શોધખોળ શરૂ કરી હતી. સફેદ કલરની KTM બાઇક પર નીકળેલા ત્રણ ગુનેગારોને  ઉધના પોલીસે  પકડી પાડયા  છે. તેમાંથી એક આકાશ ભીમરાવ બહારેન છે જેની સામે સુરતના જુદા જુદા પોલીસ સ્ટેશનમાં 17 જેટલા ગુનાહિત કેસ નોંધાયેલા છે. જ્યારે બીજો આરોપી શુભકરણ વિશ્વકર્મા છે જેની સામે સુરતના અલગ-અલગ પોલીસ સ્ટેશનમાં બે ગુના પણ નોંધાયેલા છે. ત્રીજા ગુનેગારનું નામ હાર્દિક ઘનશ્યામ ભાઈ છે જેની સામે પણ સુરતના જુદા જુદા પોલીસ સ્ટેશનમાં 2 ગુના નોંધાયેલા છે. ત્રણ ગુનેગારો સામે ચોરી, હુમલો અને ઘાતક હથિયારોની કલમો હેઠળ કુલ 21 કેસ નોંધાયેલા છે.

સુરતમાં ગુન્હેગારો બેખોફ 
સુરતમાં ગુનેગારો કેટલા બેખોફ છે તેનો અંદાજ એ વાત પરથી લગાવી શકાય છે કે બાઇક પર સવાર ગુનેગારો શહેરના માર્ગો પર ખુલ્લેઆમ છરીઓ હવામાં ઉડાવતા હતા. વીડિયો વાયરલ થયા બાદ પોલીસે તેમની ધરપકડ કરી હતી. આ સુરત શહેરની તસવીરો છે જ્યાં મજુરા વિધાનસભા વિસ્તારના ભાજપના ધારાસભ્ય હર્ષ સંઘવી ગુજરાત સરકારમાં ગૃહ રાજ્યમંત્રી છે.