સુરતની એન્જિનિયરે 41 વર્ષની ઉંમરે બની સિંગલ મધર, જોડિયા બાળકોને જન્મ આપ્યો

સંજય સિંહ રાઠોડ, સુરત:  સુરતના દેસાઈ પરિવારની એન્જિનિયર દીકરીના લગ્ન થઈ શક્યા ન હોવાથી તેણે સિંગલ મધર બનવાનું નક્કી કર્યું. 41 વર્ષની ઉંમરે તે IVF દ્વારા માતા બની છે. આ એન્જિનિયરે સુરતમાં એક પુત્ર અને એક પુત્રીને જન્મ આપ્યો છે. ડો.રશ્મિ પ્રધાને જણાવ્યું હતું કે કોઈ પણ મહિલા માટે લગ્ન વિના માતા બનવું એ ભારતીય સમાજમાં અનેક પ્રશ્નો ઉભા કરે છે, પરંતુ સુરતની ડિમ્પલ દેસાઈએ આ સમાજમાં એક નવી પહેલ કરી છે.

ડિમ્પલ દેસાઈએ જોડિયા બાળકોને જન્મ આપ્યો
સુરતની હોસ્પિટલમાં દાખલ ડિમ્પલ દેસાઈએ જોડિયા બાળકોને જન્મ આપ્યો છે. બે બાળકોને જન્મ આપીને, ડિમ્પલ સિંગલ મધર બની હોવાથી તે ટોક ઓફ ધ ટાઉન બની ગઈ છે.  સુરતના દેસાઈ પરિવારમાં બે દીકરીઓ છે. એક દીકરી રૂપલ દેસાઈ દુબઈમાં સ્થાયી થઈ ગઈ છે અને બીજી દીકરી ડિમ્પલ તેના વૃદ્ધ માતા-પિતા સાથે તેમની સેવા કરવા માટે રહે છે.

પરિવારના સાથથી કર્યું સાહસ
41 વર્ષની ડિમ્પલ અને તેની બહેન રૂપલના લગ્ન એક યા બીજા કારણોસર થઈ શક્યા ન હતા. રૂપલ દુબઈ ગયા બાદ ડિમ્પલ તેના માતા-પિતા સાથે સુરતમાં રહે છે. ડિમ્પલે પોતાના માતા-પિતાની સેવા કરવાની સાથે પોતે પણ માતા બનવાનું નક્કી કર્યું. આ પછી, તેણીએ સૌથી મોટા સામાજિક પડકારનો સામનો કરવો પડ્યો, પરંતુ ડિમ્પલ કહે છે કે જ્યારે પરિવારના સભ્યો સંમત થાય છે, ત્યારે સમાજ માટે કોઈ ચિંતા નથી.

જાણો શું કહ્યું ડોક્ટરે
ભવિષ્ય વિશે ચિંતિત, ડિમ્પલને સૌથી વધુ પ્રેરણા ડૉ. રશ્મિ પ્રધાન પાસેથી મળી. ડૉ. પ્રધાને ડિમ્પલને સમજાવ્યું કે તે બે રીતે માતા બની શકે છે, કાં તો બાળકને દત્તક લે અથવા IVF દ્વારા બાળકને જન્મ આપે. IVF થી જન્મેલા બાળક સાથે નેચર કનેક્ટ થશે. ડિમ્પલે પરિવારના સભ્યોને ડૉ. પ્રધાન વિશે જણાવ્યું અને પછી બધા સંમત થયા. આ મામલે  ડૉ. રશ્મિ એ કહ્યું હતું કે,  આ કેસમાં ઘણા તબીબી અવરોધો હતા, જે ધીમે ધીમે દૂર કરવામાં આવ્યા હતા, પરંતુ દર્દીની સામે સૌથી મોટો પડકાર સામાજિક રીતે માતા બનવા માટે માનસિક રીતે તૈયાર કરવાનો હતો.