વડાપ્રધાન મોદી બે દિવસ ગુજરાતની મુલાકાતે, જાણો સમગ્ર કાર્યક્રમ

સૌરભ વક્તાણી, અમદાવાદ: ગુજરાતમાં વિધાનસભાની ચૂંટણીના ભણકારા વાગી રહ્યા છે ત્યારે ગુજરાતની જનતાને ચૂંટણીના વર્ષમાં અનેક લાભો મળે છે અનેક યોજનાઓનું લોકાર્પણ થાય છે અને અનેક દિગ્ગજ નેતાઓના દર્શન થાય છે. ચૂંટણી નજીક આવી રહી છે ત્યારે વડાપ્રધાન નરેન્દ્ર મોદી પોતાનો ગઢ ગુજરાતને જીતવા માટે એડી ચોંટીનું બળ લગાવશે. વડાપ્રધાન મોદી સતત ગુજરાતના પ્રવાસે આવી રહ્યા છે ત્યારે આગમી તારીખ 27 તારીખ થી બે દિવસ ગુજરાતના પ્રવાસે આવી રહ્યા છે.

પ્રવક્તા મંત્રી જીતુભાઈ વાઘાણીએ પ્રધાનમંત્રીના ગુજરાત પ્રવાસની વિગતો આપતા જણાવ્યું હતું કે, નરેન્દ્ર મોદી આગામી તા. ૨૭ અને ૨૮ ઓગષ્ટ, ૨૦૨૨ દરમિયાન ગુજરાતના બે દિવસીય પ્રવાસે આવી રહ્યાં છે. તેમણે પ્રધાનમંત્રીના પ્રવાસની વિગતવાર માહિતી આપતાં કહ્યું હતું કે, પ્રધાનમંત્રી તા.૨૭ ઓગષ્ટ, ૨૦૨૨ શનિવારે અંદાજે સાંજે ૫.૧૦ કલાકે અમદાવાદ એરપોર્ટ ખાતે આગમન થશે ત્યાર બાદ સાંજે ૭.૩૦ કલાકે અમદાવાદ સાબરમતી રિવરફ્રન્ટ ખાતે યોજાનાર ‘ખાદી ઉત્સવ’ કાર્યક્રમમાં હાજરી આપશે. કાર્યક્રમ બાદ પ્રધાનમંત્રી રાજભવન, ગાંધીનગર ખાતે રાત્રિ રોકાણ કરશે.

તા. ૨૮ ઓગષ્ટ ૨૦૨૨ રવિવારે સવારે ૧૦ કલાકે કચ્છના ભુજ ખાતે નિર્માણ કરાયેલા ‘સ્મૃતિ વન મેમોરિયલ’ની મુલાકાત લઈ તેનું ઉદઘાટન કરશે.પીએમ મોદી તેની સાથે ખૂબ જ ભાવનાત્મક રીતે જોડાયેલા છે. આ મુલાકાત બાદ પ્રધાનમંત્રી નરેન્દ્ર મોદી સવારે ૧૧:૩૦ કલાકે ક્રાંતિવીર શ્યામજી કૃષ્ણવર્મા-KSKV યુનિવર્સિટી ગ્રાઉન્ડ, ભુજ ખાતે યોજાનાર જાહેર કાર્યક્રમમાં ઉપસ્થિત રહી જનસંબોધન કરશે. આ ઉપરાંત પ્રધાનમંત્રી નરેન્દ્ર મોદી બપોરે ૧૨.૦૦ કલાકે ભુજથી વિવિધ વિકાસ પ્રોજેક્ટના ખાતમુહૂર્ત તેમજ તૈયાર પ્રકલ્પો રાષ્ટ્રને સમર્પિત કરીને રાજભવન, ગાંધીનગર પરત ફરશે.

ત્યાર બાદ પ્રધાનમંત્રી મહાત્મા મંદિર, ગાંધીનગર ખાતે સાંજે ૫.૦૦ કલાકે યોજાનાર ‘ભારતમાં સુઝુકીના ૪૦ વર્ષ’ સ્મૃતિ કાર્યક્રમમાં વિશેષ હાજરી આપશે અને અંદાજે સાંજે ૬.૪૦ કલાકે દિલ્હી જવા રવાના થશે.