અરવલ્લી જિલ્લામાં આરોગ્ય વિભાગના કર્મચારી હડતાળ પર, અનેક લોકો મુશ્કેલીમાં

હિતેશ સુતરીયા, અરવલ્લી: ગુજરાતમાં ચૂંટણી નજીક આવતાની સાથે જ રાજ્યમાં અનેક વિભાગોના કર્મચારીઓ પોતાના પ્રશ્નોને લઈને સરકાર સામે આવી ગયા છે.  વિધાનસભાની ચૂંટણીઓ જેમ-જેમ નજીક આવી રહી છે તેમ-તેમ સરકારી કર્મચારીઓ પોતાની પડતર માંગણીઓનું નિરાકરણ માટે સતત માંથી રહ્યા છે. પંચાયતના તલાટીઓ હોય કે જિલ્લા પંચાયતના આરોગ્ય વિભાગના કર્મચારીઓ, પોતાની પડતર માંગણીઓને સંતોષવા માટે હડતાળનો સહારો લઈ રહ્યા છે.  રાજ્યમાં આરોગ્ય વિભાગના અનેક કર્મચારીઓએ હાલ સરકાર સામે બાંયો ચઢાવી કામથી દૂર રહેવાનો નિર્ણય કર્યો છે. ઠેર-ઠેર જિલ્લા પંચાયતોમાં સુત્રોચ્ચાર અને કલેક્ટરને આવેદન પત્રો આપી પોતાની માંગ સંતોષવા રજૂઆત કરી રહ્યા છે. ત્યારે છેલ્લા 1 સપ્તાહથી અરવલ્લી જિલ્લામાં આરોગ્ય કર્મચારીઓ હડતાળ પર છે, પણ તેઓની માંગ ક્યારે સંતોષાશે તે એક સવાલ છે.