Junagadh: 'મેડમ અસંભવ ટાર્ગેટ આપી સ્ટાફને ટોર્ચર ન કરો', યુનિયન બેંકના મેનેજરની સુસાઈડ નોટ સામે આવી

Junagadh News: જૂનાગઢના ઝાંઝરડા રોડ પર આવેલી માઇલસ્ટોન બિલ્ડીંગની ગેલેરીમાં થોડા દિવસ પહેલા યુનિયન બેંકના મેનેજરે ગળેફાંસો ખાઈને આપઘાત કર્યાના સમાચાર મળતા સમગ્ર શહેરમાં ચકચાર મચી ગઇ હતી. આપઘાતના થોડા દિવસો બાદ હવે બેંક મેનેજરની સુસાઈડ નોટ બહાર આવી છે, જેમાં બેંકમાં પૂરા ન થાય તેવા ટાર્ગેટ અને અસહ્ય હેરાનગતિ કરાતી હોવાનો ઉલ્લેખ છે. પોલીસે આ સુસાઈડ નોટ અત્યાર સુધી છુપાવી રાખી હતી, પોલીસ કોને બચાવવા માંગતી હતી તેવો પણ સવાલ ઉઠી રહ્યો છે.

બેંક મેનેજર કર્યો હતો આપઘાત

યુનિયન બેંકના ચીફ મેનેજર સિયારામ પ્રસાદ, જેઓ ઉત્તર પ્રદેશના જૌનપુરના રહેવાસી હતા, સવારે ચાલવાના બહાને પોતાના ઘરેથી નીકળ્યા હતા અને માઈલ સ્ટોન બિલ્ડિંગના ત્રીજા માળેથી દોરડું બાંધીને પોતાની જાતને બાંધી દીધી હતી અને પછી કૂદી ગયા હતા. બાલ્કનીની રેલિંગમાંથી ફાંસો લગાવી આત્મહત્યાની સમગ્ર ઘટના સીસીટીવીમાં કેદ થઈ હતી. મોડે સુધી તેઓ ઘરે ન પહોંચતા પરિવારજનોએ શોધખોળ શરૂ કરતાં સિયારામે આત્મહત્યા કરી હોવાનું જાણવા મળ્યું હતું.

આપઘાત બાદ સુસાઈડ નોટ સામે આવી

સિયારામ પાસેથી મળેલી સ્યુસાઈડ નોટમાં તેમણે સ્પષ્ટ લખ્યું છે કે ‘MD ECO મેડમે અશક્ય ટાર્ગેટ આપીને અત્યાચાર ન કરે.’ જોબ જોઈનિંગ લેટરમાં અમને માત્ર એક જ વિભાગ, CRLDનું કામ સોંપવામાં આવ્યું હતું, પરંતુ અમારી પાસે ફરજિયાત ત્રણ વિભાગો, CRLD, CMCC અને RCOCનું કામ કરાવવામાં આવે છે, સ્ટાફની પણ અછત છે. યુનિયન બાજી કરવામાં આવે છે અને  અમને ત્રાસ આપવામાં આવે છે, હું MDECO મેડમને વિનંતી કરું છું કે અશક્ય ટાર્ગેટ આપીને અત્યાચાર ન કરો, નહીં તો અન્ય લોકો પણ મારી જેમ આત્મહત્યા કરી લેશે. મારી પત્નીને તાત્કાલિક નોકરી અપાવવાની અને તેનું પેન્શન ચાલુ કરાવવાની જવાબદારી બેંકની છે.

પોલીસે સમગ્ર મામલે તપાસ શરૂ કરી

ડીયુએસપી ધાંધલિયાએ જણાવ્યું કે, પોલીસે આત્મહત્યાનો ગુનો નોંધ્યો છે. સિયારામે કામના બોજ હેઠળ આત્મહત્યા કરી છે અને સ્યુસાઈડ નોટમાં સ્પષ્ટ લખ્યું છે કે તે બેંકમાં ત્રણ વિભાગમાં નોકરી કરતો હતો અને આ સમસ્યાના કારણે તેણે આપઘાત કર્યો હતો. પોલીસે આ ઘટનાની તપાસ શરૂ કરી છે. હાલમાં, એવું માનવામાં આવે છે કે કામના ભારણને કારણે તેણે આત્મહત્યા કરી લીધી. એવું શું કામ કરાવામાં આવતું હતું કે સિયારામને આત્મહત્યા કરવા મજબૂર થવું પડ્યું? આ અંગે તપાસ કરવામાં આવી રહી છે. પોલીસ તપાસ બાદ જ સાચો મામલો બહાર આવશે. હાલમાં પોલીસ સ્ટાફના પરિવારજનોની પૂછપરછ કરી રહી છે.

(ઈનપુટ: ભાર્ગવી જોશી, જૂનાગઢ)