ગુજરાત ATSને મોટી સફળતા, ભારતની નાગરિકતા મેળવી જાસૂસી કરતો પાકિસ્તાની હિન્દુ ઝડપાયો

Gujarat ATS: ગુજરાત ATSને આણંદના તારાપુરમાંથી 53 વર્ષીય લાભશંકર મહેશ્વરી નામના પાકિસ્તાની જાસૂસ મળી આવ્યો છે. પાકિસ્તાન માટે જાસૂસી કરતા લાભશંકર મૂળ પાકિસ્તાની હિન્દુ છે અને તેણે ભારતની નાગરિકતા મેળવી હતી અને અહીં રહેતો હતો. કચ્છમાં પોતાના સાસરીમાં રોકાઈને તેણે જાસૂસી કરી હતી. ATS દ્વારા તેની ધરપકડ કરી લેવામાં આવી છે.

MIએ શોધી કાઢ્યું પાકિસ્તાનનું જાસૂસી ઓપરેશન

વિગતો મુજબ, MIના અધિકારીઓએ જુલાઈના ત્રીજા સપ્તાહમાં એક પાકિસ્તાની ઇન્ટેલિજન્સ ઓપરેટિવ (PIO) દ્વારા ચલાવવામાં આવી રહેલા નાપાક ઓપરેશનને શોધી કાઢ્યું હતું. જેમાં એક વોટ્સએપ નંબર દ્વારા, સુરક્ષા દળોના જવાનોને 15 ઓગસ્ટ પહેલા તેમના એન્ડ્રોઇડ મોબાઇલ હેન્ડસેટમાં ‘હર ઘર તિરંગા’ અભિયાનના નામથી ‘apk’ એન્ડ્રોઇડ એપ્લિકેશન ડાઉનલોડ કરવા માટે કહેવામાં આવ્યું હતું.

કેવી રીતે થતી જાસૂસી?

શાળાના અધિકારીઓના રૂપમાં એક સંદેશ પણ મોકલવામાં આવ્યો હતો કે, લોકોએ તેમના બાળક સાથે રાષ્ટ્રધ્વજની તસવીર અપલોડ કરવી જોઈએ. તપાસમાં સામે આવ્યું છે કે, આરોપી લાભશંકર મહેશ્વરીએ આ ભારતીય નંબર પાકિસ્તાની ગુપ્તચર એજન્સીને આપ્યો હતો. આરોપીના મોબાઈલની ફોરેન્સિક તપાસમાં સામે આવ્યું છે કે, આ વોટ્સએપ નંબરનો ઉપયોગ પાકિસ્તાની ગુપ્તચર એજન્સીના લોકો કરતા હતા અને તેમના મોબાઈલમાંથી ગુપ્ત માહિતી મેળવવા માટે સુરક્ષા કર્મચારીઓના મોબાઈલ હેક કરી રહ્યા હતા.

આર્મી સ્કૂલના વિદ્યાર્થીઓના માતા-પિતાનો ડેટા હેક કરતા

એવી પણ શંકા છે કે પાકિસ્તાની એજન્સીઓએ APS (આર્મી પબ્લિક સ્કૂલ)ની વેબસાઈટ અથવા એન્ડ્રોઈડ એપ્લીકેશન “Digicamps” દ્વારા APS વિદ્યાર્થીઓ અને તેમના માતા-પિતા સંબંધિત માહિતી મેળવવામાં વ્યવસ્થાપિત કરી છે. જેનો ઉપયોગ ફી વસૂલવા માટે થાય છે. આ એવી શાળાઓ છે જે ભારતીય સેનાના સહયોગથી એક ખાનગી સંસ્થા આર્મી વેલ્ફેર એજ્યુકેશન સોસાયટી (AWES) હેઠળ આવે છે.

1999માં પાકિસ્તાનથી ભારત આવ્યો

આરોપી લાભશંકર મહેશ્વરી મૂળ પાકિસ્તાની હિંદુ છે જે 1999માં સારવાર માટે તેની પત્ની સાથે ભારત આવ્યો હતો. શરૂઆતમાં તે તારાપુરમાં તેના સાસરે રહેતો હતો, પછી ધીમે ધીમે તેણે ત્યાં ઘણી દુકાનો ખોલી અને તેણે સારો બિઝનેસ કર્યો. તેને 2006માં ભારતીય નાગરિકતા મળી હતી. 2022 ની શરૂઆતમાં, આરોપી પાકિસ્તાનમાં તેના માતાપિતાને મળવા ગયો હતો.

વિઝા પ્રક્રિયા દરમિયાન અને તેના માતા-પિતાના ઘરે દોઢ મહિનાના રોકાણ દરમિયાન કથિત રીતે તેનું બ્રેઈનવોશ કરવામાં આવ્યું હતું. ત્યારથી તે પાકિસ્તાની ગુપ્તચર એજન્સીના સંપર્કમાં છે. વોટ્સએપ એકાઉન્ટ બનાવ્યા બાદ બાદમાં તેણે સિમ કાર્ડ પાકિસ્તાન મોકલ્યું અને તેના બદલામાં પૈસા મળ્યા.