Ahmedabad Metroની કામગીરીમાં ગંભીર બેદરકારી, નિર્માણાધીન પિલર ફ્લેટ પર નમી પડતા દોડાદોડ

અમદાવાદ: મંગળવારે સવારથી જ અનેક વિસ્તારોમાં વરસાદી માહોલ સર્જાયો છે. આજે દિવસભર પૂર્વ અને પશ્ચિમના અનેક વિસ્તારોમાં અડધો ઈંચ જેટલો વરસાદ પડ્યો હતો. ત્યારે થલતેજમાં મેટ્રોના (Ahmedabad Metro) નિર્માણાધીન લોખંડનો પિલર નમી પડતા સ્થાનિકોના જીવ પડીકે બંધાયા હતા. ચાલુ વરસાદમાં મેટ્રોનો આ પિલર ફ્લેટ પર નમી પડતા અધિકારીઓ સ્થળ પર દોડી ગયા હતા.

લોખંડનો પિલર ફ્લેટ પર નમી પડ્યો
અમદાવાદમાં ચાલી રહેલા મેટ્રોના કામમાં આજે મોટી બેદરકારી સામે આવી છે. થલતેજમાં મેટ્રોના કામગીરી દરમિયાન નિર્માણાધીન લોખંડનો પિલર બાજુના ફ્લેટ પર નમી પડ્યો હતો. ઘટનાને પગલે સ્થાનિકોમાં અફરાતફરી મચી ગઈ હતી. જોકે સમયસ્થળ સ્થાનિ લોકો સુરક્ષિત સ્થળે ખસી જતા જાનહાનિ થતા ટળી હતી. બીજી તરફ ઘટનાને લઈને ફાયર વિભાગ અને મેટ્રોની ટીમના અધિકારીઓ સ્થળ પર દોડી ગયા હતા. રોડ પર ભયજનક રીતે નમી ગયેલા આ લોખંડના પિલરને સીધો કરવાની કામગીરી કરવા માટે સૂચના આપી હતી.

નવરાત્રિ સુધીમાં અમદાવાદીઓને મળી શકે મેટ્રોની ભેેટ
નોંધનીય છે કે, અમદાવાદમાં અનેક સ્થળોએ મેટ્રોની કામગીરી ચાલી રહી છે. જેમાં પ્રથમ ફેઝમાં વસ્ત્રાલથી એપેરલ પાર્ક સુધી હાલમાં મેટ્રો દોડી રહી છે. ત્યારે નવરાત્રિ સુધીમાં અમદાવાદીઓને મેટ્રો ટ્રેનની સુવિધા મળી શકે છે. તાજેતરમાં જ મેટ્રોના ઉત્તર-દક્ષિણ કોરિડોર પર મેટ્રોના ટ્રાયલ ચાલી રહ્યા છે. આગામી 20મી ઓગસ્ટના રોજ 40 કિલોમીટરના રૂટની કામગીરીનું કમિશનર ઓફ મેટ્રો રેલ સેફ્ટી નીરિક્ષણ કરવાના છે.

આ હશે કોરિડોર-1ના સ્ટેશન
મેટ્રોના કોરિડોર 1ના સ્ટેશનમાં જીવરાજ પાર્ક, રાજીવનગર, શ્રેયસ, પાલડી, ગાંધીગ્રામ, જૂની હાઈકોર્ટ, ઉસ્માનપુરા, વિજયનગર, વાડજ, રાણીપ, સાબરમતી રેલવે સ્ટેશન, AEC, સાબરમતી અને મોટેરા સ્ટેશનનો સમાવેશ થશે.

આ હશે કોરિડોર-2ના સ્ટેશન
મેટ્રોના કોરિડોર-2ના સ્ટેશનમાં થલતેજ ગામ, થલતેજ, દૂરદર્શન કેન્દ્ર, ગુરુકુલ રોડ, ગુજરાત યુનિવર્સિટી, કોમર્સ છ રસ્તા, એસપી સ્ટેડિયમ, જૂની હાઈકોર્ટ, શાહપુર, ઘીકાંટા, કાલુપુર મેટ્રો સ્ટેશન, કાંકરિયા પૂર્વ, એપેરલ પાર્ક, અમરાઈવાડી, રબારી કોલોનીમાંથી પસાર થશે. , વસ્ત્રાલ, નિરાંત ચોકડી, વસ્ત્રાલ ગામનો સમાવેશ થશે.