તો શું કોંગ્રેસની સરકાર બની રહી છે? કોંગ્રેસના નેતાએ ટ્વીટ કરતા રાજકારણ ગરમાયું

અમદાવાદ : ગુજરાત વિધાનસભાની ચૂંટણીનું પ્રથમ તબક્કાનું મતદાન પૂર્ણ થઇ ચુક્યું છે. પ્રથમ તબક્કાનું આશરે 60.35 ટકા નોંધાયું છે. સૌરાષ્ટ્ર કચ્છમાં 58 ટકા જેટલું મતદાન થયું છે. બીજી તરફ દક્ષિણ ગુજરાતમાં પણ આશરે 66 ટકા જેટલું મતદાન નોંધાયું છે. બીજા તબક્કાનું મતદાન 5 ડીસેમ્બરે યોજાય તે પહેલા ભાજપ કોંગ્રેસ અને આપ સહિતના તમામ પક્ષો સભાઓ ગજવી રહ્યા છે. 5 ડિસેમ્બરે મધ્ ગુજરાત અને ઉત્તર ગુજરાતની 93 બેઠક પર ચૂંટણી યોજાવાની છે. ગત્ત ચૂંટણી કરતા આ વખતે ઓછુ મતદાન નોંધાઇ રહ્યું છે, તેના કારણે કોંગ્રેસ ખુબ જ ખુશ જોવા મળી રહી છે.

પવન ખેરાએ કહ્યું ITના દરોડા ભાજપની નિષ્ફળતાનું પ્રતિક છે
ગુજરાત કોંગ્રેસના પ્રભારી રઘુ શર્માના અનુસાર પ્રથમ તબક્કામાં 65 સીટ પર કોંગ્રેસ જીતે તેવી શક્યતા છે કોંગ્રેસના રાષ્ટ્રીય પ્રવક્તા પવન ખેરાએ પણ દાવો કરતા જણાવ્યું કે, પ્રથમ તબક્કાની ચૂંટણીમાં 55 બેઠકો પર કોંગ્રેસની જીત થાય તેવો આશાવાદ તેમણે વ્યક્ત કર્યો હતો. કોંગ્રેસના દિગ્ગજ ઉમેદવાર ઇન્દ્રનીલ રાજ્યગુરૂ પણ 35 થી વધારે સીટોનો દાવો ઠોકી રહ્યા છે.

પવન ખેરાએ ટ્વીટ કરતા લખ્યું કે, ગઇ કાલે પ્રથમ તબક્કાની ચૂંટણી થઇ અને આજે સુરતના વેપારીઓ પર દરોડા પડી રહ્યા છે. જે સ્પષ્ટ રીતે ભાજપની નિરાશા વ્યક્ત કરી રહ્યા છે. આ હાર જોઇ ચુકેલા ભાજપનો રોષ છે. મીડિયા પણ જાણે છે કે, પ્રથમ તબક્કામાં 89 બેઠકો પૈકી કોંગ્રેસ 55 સીટો જીતી રહી છે.

કોંગ્રેસ પ્રભારી રઘુ શર્માએ ટ્વીટ કરી કહ્યું અમારી સરકાર બની રહી છે
બીજી તરફ ગુજરાત કોંગ્રેસના પ્રભારી રઘુ શર્માએ પણ ભાજપને ઘેરતા લખ્યું કે, ગુજરાતમાં ભાજપની સ્થિતિ ખુબ જ ખરાબ છે. ભાજપ વિરુદ્ધ લોકોમાં ભારે રોષ અને આક્રોશ જોવા મળી રહ્યો છે. લોકો તરફથી ખુબ જ સહયોગ મળ્યો અને ઇનપુટ મળી રહ્યા છે. પ્રથમ તબક્કાની 65 સીટો પર કોંગ્રેસ જીતે તેવી શક્યતા છે. કોંગ્રેસ 125 થી વધારે ટાર્ગેટને પાર કરવા તરફ આગળ વધી રહી છે.

ઇન્દ્રનીલ રાજ્યગુરૂએ કહ્યું કે, સૌરાષ્ટ્રમાં પ્રચંડ બહુમતી મળી રહી છે
રાજકોટમાં કોંગ્રેસના ઉમેદવાર ઇન્દ્રનીલ રાજ્યગુરૂએ જણાવ્યું કે, ઓછા મતદાનથી ભાજપને ભારે નુકસાન થઇ રહ્યું છે. ભાજપમાંથી લોકોનો વિશ્વાસ ઉઠી રહ્યો છે. સૌરાષ્ટ્રમાં 35 થી વધારે સીટો કોંગ્રેસમાં આવશે. કોંગ્રેસની વોટબેંક ફિક્સ થઇ ચુકી છે. મતદારો ભાજપથી નારાજ છે. ભાજપના કાર્યકરોએ પણ તેની વિરુદ્ધ મતદાન કરાવ્યું છે.