Lok Sabha Election Result: શરદ પવારે NDAના બે સાથી પક્ષોને ફોન કર્યો? JDUએ કરવો પડ્યો ખુલાસો

Lok Sabha Election Result: લોકસભા ચૂંટણી 2024ના ચાલી રહેલા ટ્રેન્ડમાં NDAને બહુમતી મળતી દેખાઈ રહી છે. ભાજપના નેતૃત્વમાં NDA 290થી વધુ સીટો પર સતત આગળ  ચાલી રહ્યું છે. તે જ સમયે, કોંગ્રેસના નેતૃત્વ હેઠળ INDIA બ્લોક પણ છેલ્લી ચૂંટણીઓ કરતાં વધુ સારો દેખાવ કરી રહ્યો છે. ઈન્ડિયા બ્લોક પણ ટ્રેન્ડમાં 230 સીટોની આસપાસ લીડ ધરાવે છે. ટ્રેન્ડમાં નોંધનીય બાબત એ છે કે ભાજપ એકલા હાથે 272નો બહુમતીનો આંકડો પાર કરી શકશે નહીં. ભાજપે ટીડીપી અને જેડીયુ જેવા સાથી પક્ષો પર નિર્ભર રહેવું પડશે. આવી સ્થિતિમાં ભાજપ માટે એ જરૂરી બની જાય છે કે તે પોતાના સાથી પક્ષોને સાથે રાખે એટલું જ નહીં, તેમને વફાદાર પણ રાખે. 

ચૂંટણી પરિણામમાં ભાજપ બહુમતિથી દૂર

બીજી તરફ INDIA બ્લોક બહુમતીની નજીક આવતો જોઈ મહાગઠબંધનના મોટા નેતાઓ સક્રિય થઈ ગયા છે. આ દરમિયાન મહારાષ્ટ્રના રાજકારણના ભીષ્મ પિતામહ ગણાતા શરદ પવાર ટીડીપીના વડા એન ચંદ્રબાબુ નાયડુના સંપર્કમાં આવ્યા હોવાનું પ્રકાશમાં આવી રહ્યું છે. તમને જણાવી દઈએ કે ચાલી રહેલા ટ્રેન્ડમાં, NDA ગઠબંધનને જે બેઠકો મળી રહી છે તેમાં TDPનો મોટો હિસ્સો (બીજો સૌથી મોટો) છે. આંધ્રપ્રદેશમાં ભાજપ અને ટીડીપીએ સંયુક્ત રીતે લોકસભા અને વિધાનસભાની ચૂંટણી લડી હતી. આંધ્રપ્રદેશમાં ટીડીપી હાલમાં 16 સીટો પર આગળ છે.

શરદ પવારે NDAના પક્ષોને ફોન કર્યો?

સૂત્રોના જણાવ્યા અનુસાર શરદ પવાર ટીડીપીના વડા એન ચંદ્રબાબુ નાયડુ સાથે વાત કરે તેવી ચર્ચા છે. જોકે બાદમાં તેમણે આ વાત અફવા હોવાનો ખુલાસો કર્યો હતો. જો નાયડુના વલણમાં કોઈ ફેરફાર થશે તો એનડીએને સરકાર બનાવવામાં મુશ્કેલીનો સામનો કરવો પડી શકે છે. બીજી તરફ, ભાજપના આંધ્ર પ્રદેશ મામલાના પ્રભારી સિદ્ધાર્થનાથ સિંહે ચંદ્રાબાબુ નાયડુ સાથે સૌજન્ય મુલાકાત કરી હતી.

આ પહેલા ટીડીપીના વડા નારા ચંદ્રબાબુ નાયડુએ વડાપ્રધાન નરેન્દ્ર મોદી અને કેન્દ્રીય મંત્રી અમિત શાહ સાથે ફોન પર વાત કરી હતી. ટીડીપી નેતાએ એનડીએ ગઠબંધનને મહત્તમ બેઠકો મેળવવા બદલ અભિનંદન પાઠવ્યા હતા. જ્યારે વડાપ્રધાન મોદી અને અમિત શાહે આંધ્ર પ્રદેશમાં NDA ગઠબંધનની શાનદાર જીત પર ચંદ્રબાબુ નાયડુને અભિનંદન પાઠવ્યા હતા. જે બાદ ચંદ્રબાબુ નાયડુએ બંને નેતાઓનો આભાર માન્યો હતો.

JDUએ કર્યો ખુલાસો

દરમિયાન, પાર્ટીએ ફરી એકવાર JDU પક્ષ બદલવાની કોઈપણ અટકળોને નકારી કાઢી છે. જેડીયુના નેતા કેસી ત્યાગીએ કહ્યું છે કે સીએમ નીતિશ કુમાર અને તેમની પાર્ટી જેડીયુ એનડીએ સાથે રહેશે. આ ઉપરાંત બિહારના નાયબ મુખ્યમંત્રી સમ્રાટ ચૌધરી પણ રાજ્યના સીએમ નીતિશ કુમારને મળવા પહોંચ્યા છે.

ટ્રેન્ડને જોતા આ બેઠકો અને વાતચીતને ખૂબ જ મહત્વપૂર્ણ માનવામાં આવી રહી છે. જેમ જેમ લોકસભા ચૂંટણીના પરિણામોનું ચિત્ર સ્પષ્ટ થશે તેમ તેમ નેતાઓ વચ્ચેની આ વાતચીત અને બેઠકો મહત્વની બનશે.