NEET પેપર લીક વિવાદ પર શિક્ષણમંત્રી ધર્મેન્દ્ર પ્રધાનનું મોટું નિવેદન, પરીક્ષા ફરી લેવાની માંગ પર શું બોલ્યા?

NEET Exam 2024: NEET પરીક્ષા વિવાદ પર સુપ્રીમ કોર્ટના નિર્ણય બાદ કેન્દ્રીય શિક્ષણ મંત્રી ધર્મેન્દ્ર પ્રધાનનું નિવેદન સામે આવ્યું છે. આ બાબતને ગંભીરતાથી લેતા તેમણે કહ્યું છે કે NEET પરીક્ષાના મામલામાં દોષિતોને કડક સજા આપવામાં આવશે. તેમણે કહ્યું કે દોષિતો સામે પારદર્શિતા સાથે કાર્યવાહી કરવામાં આવશે. ધર્મેન્દ્ર પ્રધાને કહ્યું કે, NEET પરીક્ષામાં કોઈ ભ્રષ્ટાચાર થયો નથી. અમે કોઈ વિદ્યાર્થી સાથે અન્યાય નહીં થવા દઈએ.

ધર્મેન્દ્ર પ્રધાનનું આ નિવેદન એવા સમયે આવ્યું છે જ્યારે સુપ્રીમ કોર્ટે ગ્રેસ માર્કસ મેળવનારા 1563 ઉમેદવારોની ફરીથી પરીક્ષા કરવાનો આદેશ આપ્યો છે. આ પરીક્ષા 23મી જૂને લેવામાં આવશે. તેના પરિણામો 30 જૂન સુધીમાં આવશે, જોકે સુપ્રીમ કોર્ટે NEETના કાઉન્સેલિંગ પર પ્રતિબંધ મૂકવાનો ઇનકાર કરી દીધો છે. આ પહેલા પણ NEETના પેપર લીક થવાનું કારણ આપીને NEETના પરિણામ પર પ્રતિબંધ મૂકવાની માંગ કરવામાં આવી હતી, પરંતુ તે પછી પણ સુપ્રીમ કોર્ટે NEETના પરિણામ પર પ્રતિબંધ મૂકવાનો ઈન્કાર કરી દીધો હતો.

Physics Wallah એ શું કહ્યું?

NEET કેસમાં એજ્યુકેશન ટેક કંપની Physics Wallah ના CEO અલખ પાંડે વતી સુપ્રીમ કોર્ટમાં અરજી પણ દાખલ કરવામાં આવી છે. આજે સુપ્રીમ કોર્ટના નિર્ણય બાદ અલખ પાંડેએ કહ્યું કે પહેલી જ સુનાવણીમાં નેશનલ ટેસ્ટિંગ એજન્સીએ મોટી હદ સુધી પોતાની ભૂલો સ્વીકારી છે. કોર્ટે તેમના મંતવ્યો ખૂબ જ સંવેદનશીલતા સાથે સાંભળ્યા છે. તેમણે વિદ્યાર્થીઓને પણ ચિંતા ન કરવાની સલાહ આપી છે કારણ કે કોર્ટ તેમની વાત મક્કમતાથી સાંભળી રહી છે.

શું કહ્યું અરજદારના વકીલે?

NEET કેસમાં ત્રીજા અરજદારના વકીલ દિનેશ જોતવાણીએ કહ્યું કે 1563 નંબર ઘણો ઓછો છે. આવતીકાલે અમે ફરીથી કોર્ટ સમક્ષ અમારી માંગણી કરીશું કે નેશનલ ટેસ્ટિંગ એજન્સી દ્વારા આપવામાં આવેલ આ આંકડો તદ્દન ખોટો છે.