NEET પેપરલીક વિવાદ વચ્ચે સરકારનો મોટો નિર્ણય, NTAના મહાનિર્દેશકની કરી હકાલપટ્ટી

NEET Paper Leak: નેશનલ ટેસ્ટિંગ એજન્સી (NTA)ના ડાયરેક્ટર જનરલ (DG) સુબોધ કુમારની પદ પરથી હકાલપટ્ટી કરી દેવામાં આવી છે. તેમના સ્થાને નિવૃત્ત IAS પ્રદીપ સિંહ ખરોલા NTAના મહાનિર્દેશક હશે. પ્રદીપ સિંહ ખારોલા કર્ણાટક કેડરના IAS રહી ચૂક્યા છે. તાજેતરના NEET પેપર લીક અને UGC-NET પરીક્ષા પેપર લીક મુદ્દે NTA પર સતત પ્રશ્નો ઉઠાવવામાં આવી રહ્યા હતા. હવે આ મામલે સરકારે મોટી કાર્યવાહી કરી છે. વિપક્ષ પેપર લીકને લઈને સરકાર પર સતત સવાલો ઉઠાવી રહ્યો હતો અને દેશભરમાં વિદ્યાર્થીઓ દ્વારા દેખાવો કરવામાં આવી રહ્યા હતા.

NTAની રચના એટલા માટે કરવામાં આવી હતી કે પ્રવેશ પરીક્ષાઓ ખામીઓથી મુક્ત થઈ શકે, પરંતુ NTAનું મોડલ વારંવાર નિષ્ફળ થઈ રહ્યું છે. CSIR-UGC-NET પરીક્ષા 21મી જૂન (શુક્રવાર)ની રાત્રે મોકૂફ રાખવામાં આવી હતી. આ પરીક્ષા 25 થી 27 જૂન દરમિયાન યોજાવાની હતી. પરીક્ષા મોકૂફ રાખવા પાછળ સંસાધનોની અછતનું કારણ જણાવવામાં આવ્યું છે.

ઉત્તર પ્રદેશ, હરિયાણા, ઉત્તરાખંડ, રાજસ્થાન, મધ્ય પ્રદેશ, ગુજરાત, બિહાર, ઝારખંડ, ઓડિશા, મહારાષ્ટ્ર, કર્ણાટક, તેલંગાણા, આસામ, અરુણાચલ પ્રદેશ અને જમ્મુ કાશ્મીર... દેશના આ એવા 15 રાજ્યો છે જ્યાં 41 ભરતી પરીક્ષાઓના પેપર છેલ્લા 5 વર્ષમાં લીક થયા છે. તમામ મોટા રાજ્યોના કરોડો વિદ્યાર્થીઓ તેનાથી પરેશાન છે. NEET પરીક્ષામાં થયેલી ગેરરીતિઓ પછીના આ વિરોધે આ ગુસ્સાને અવાજ આપ્યો છે.

NTA કેવી રીતે અસ્તિત્વમાં આવ્યું?

વર્ષ 2017 માં, માનવ સંસાધન વિકાસ મંત્રાલયે ઉચ્ચ શિક્ષણમાં પ્રવેશ માટે એકલ, સ્વાયત્ત અને સ્વતંત્ર એજન્સીની રચનાની જાહેરાત કરી. પ્રવેશ પરીક્ષાઓને ખામીઓથી મુક્ત રાખવાના ઉદ્દેશ્ય સાથે તેને સ્થાપિત કરવાનું સરકાર દ્વારા કહેવામાં આવ્યું હતું. અને 1 માર્ચ, 2018 ના રોજ, NTA એટલે કે નેશનલ ટેસ્ટિંગ એજન્સી (NTA) અસ્તિત્વમાં આવી.

NTAની સ્થાપના બાદથી દર વર્ષે પરીક્ષામાં ગેરરીતિના આક્ષેપો

NTA ની રચના વર્ષ 2018 માં કરવામાં આવી હતી, પરંતુ તેની શરૂઆતથી લગભગ દર વર્ષે પરીક્ષામાં ગેરરીતિના આરોપો થયા છે. વર્ષ 2019 માં JEE મેઈન દરમિયાન, વિદ્યાર્થીઓને સર્વરની ખામીને કારણે સમસ્યાઓનો સામનો કરવો પડ્યો હતો. આ ઉપરાંત કેટલીક જગ્યાએ વિદ્યાર્થીઓએ પ્રશ્નપત્રમાં વિલંબની ફરિયાદ પણ કરી હતી. NEET અંડરગ્રેજ્યુએટ મેડિકલ એન્ટ્રન્સ પરીક્ષા 2020માં NTA પર ગંભીર પ્રશ્નો ઉઠાવવામાં આવ્યા હતા. પરીક્ષા ઘણી વખત મોકૂફ રાખવી પડી હતી. આ પરીક્ષામાં ગેરરીતિની અનેક ફરિયાદો ઉઠી હતી.

અગાઉ પણ અનેક વિવાદોમાં આવી ચૂક્યું છે NTA

વર્ષ 2021 માં, JEE મેન્સ પરીક્ષામાં કેટલાક ખોટા પ્રશ્નોને લઈને હોબાળો થયો હતો. ઘણી જગ્યાએ, શિક્ષણ માફિયાઓ દ્વારા પરીક્ષા ખોટી રીતે પાસ કરાવવાના પ્રયાસોના આક્ષેપો પણ થયા હતા. 2021 માં જ, રાજસ્થાનના ભાંકરોટામાં સોલ્વર ગેંગ દ્વારા NEET પરીક્ષામાં ગેરરીતિનો કિસ્સો પ્રકાશમાં આવ્યો હતો. આ બાબતને લઈને દેશભરમાં હોબાળો થયો હતો, વર્ષ 2022માં વિવિધ કેન્દ્રીય, રાજ્ય, ખાનગી અને ડીમ્ડ યુનિવર્સિટીઓમાં પ્રવેશ માટે લેવામાં આવેલી કોમન યુનિવર્સિટી એન્ટ્રન્સ ટેસ્ટમાં ગેરરીતિની ફરિયાદો આવી હતી. સૌથી વધુ ફરિયાદો રાજસ્થાનમાંથી આવી છે.

આ પછી એજન્સી કેટલીક જગ્યાએ ફરીથી પરીક્ષા લેવાની હતી. આ વર્ષે NEET પરીક્ષામાં પણ ગેરરીતિની ફરિયાદો આવી હતી. આ વર્ષે NEET પરીક્ષાને લઈને દેશભરમાં હોબાળો ચાલી રહ્યો છે. વિદ્યાર્થીઓ ગ્રેસ માર્ક્સ અંગે ગુસ્સે છે. તે જ સમયે, બિહારમાં પેપર લીકનો ખુલાસો થયો છે. જેના કારણે NTAની વિશ્વસનીયતા અને પારદર્શિતા પર સવાલ ઉઠી રહ્યા છે.

18 જૂને લેવાયેલી UGC-NET પરીક્ષા પણ રદ કરવામાં આવી છે. યુજીસીને પેપર લીક થવા અંગે ગૃહ મંત્રાલય તરફથી ઇનપુટ મળ્યા બાદ આ નિર્ણય લેવામાં આવ્યો હતો. આ રીતે, NTAની સ્થાપનાના 6 વર્ષમાં, 2018 અને 2023ના વર્ષમાં માત્ર બે વાર પેપર લીક અને ગેરરીતિની કોઈ ફરિયાદ નથી, અન્યથા NTAની રચના પછી લગભગ દર વર્ષે પરીક્ષા સવાલોથી ઘેરાયેલી રહી છે.