સુરતમાં પઠાણી ઉઘરાણી: સાડીના વેપારીનું પૂણેથી અપહરણ, 40 લાખની માંગણી; વેપારીએ હોટલની બારીમાંથી કૂદી જીવન ટૂંકાવ્યું

Surat News: સુરતના ડિંડોલી વિસ્તારમાં ચોથા માળે આવેલી હોટલમાંથી રહસ્યમય રીતે નીચે પટકાતા યુવકનું મોત નીપજ્યું હતું. પોલીસ પણ આ ઘટનાને લઈને મૂંઝવણમાં મુકાઈ ગઈ હતી. ત્યારબાદ પોલીસ તેનાં પરિવારજનો સુધી પહોંચતા જે હકીકત સામે આવી તે જાણીને પોલીસ પણ ચોકી ગઈ હતી. પૂણેના સાડીના વેપારીનું સુરતના ચાર ટેક્સટાઇલના વેપારીઓ અપહરણ કરી લાવ્યા હતા અને ત્યારબાદ હોટલમાં ગોંધી રાખ્યો હતો. આ સાથે જ 40 લાખ રૂપિયાની માંગણી કરવામાં આવી રહી હતી. જેથી, કંટાળીને સાડીના વેપારીએ હોટલના બાથરૂમના રૂમની બારીમાંથી કૂદીને આપઘાત કરી લીધો હતો. આ સમગ્ર ઘટના CCTVમાં પણ કેદ થઈ ગઈ હતી. હાલ સાડીના વેપારીની પત્નીની ફરિયાદના આધારે ડીંડોલી પોલીસે ટેક્સટાઇલના ચાર વેપારીઓ વિરુદ્ધ દુષ્પ્રેરણાનો ગુનો નોંધીને વધુ તપાસ હાથ ધરી છે.

મૃતક કાપડની દુકાન ધરાવતો હતો

મૂળ રાજસ્થાનનો 35 વર્ષીય રાકેશ પાંચારામ ચૌધરી મહારાષ્ટ્રના પૂણે ખાતે પરિવાર સાથે રહેતો હતો. પરિવારમાં માતા-પિતા, પત્ની અને એક છ વર્ષની દીકરી છે. રાકેશે 8 વર્ષ પહેલાં પૂજા સાથે પ્રેમલગ્ન કર્યાં હતાં. રાકેશ પદ્માવતી કલેક્શનના નામથી કાપડની દુકાન ધરાવતો હતો અને સાડીનો વેપારી હતો. રાકેશનો વેપાર-ધંધો સુરત, કર્ણાટક આ તમામ જગ્યાઓ પર હતો. વેપાર-ધંધાને લઈને તે કર્ણાટક, સુરત, તમિલનાડુ સહિતની જગ્યાઓ પર તે આવતો જતો રહેતો હતો. ગત 6 ઓગસ્ટના રોજ રાકેશ પુણેથી તમિલનાડુના મદુરાઈ જવા માટે ઘરેથી નીકળ્યો હતો. એરપોર્ટ પર તેની ફ્લાઈટ હોવાથી સવારે 11:30 વાગે ઘરેથી એરપોર્ટ જવા રવાના થયો હતો. ત્યારબાદ સાંજે સાડા પાંચ વાગ્યે રાકેશે તેની પત્ની પૂજાને જાણ કરી હતી કે, સુશીલ જોશી, હરીશ, ગૌતમ અને જયેશ એરપોર્ટ જતા સમયે રસ્તામાં મળી ગયા હતા. ત્યારબાદ આ ચારેય જબરદસ્તી મને સુરત લઈને જઈ રહ્યા છે. જેથી, મદુરાઈ જવાનું કેન્સલ કરી દીધું છે. એક કલાક બાદ રાકેશે પત્નીને કોલ કરીને જણાવ્યું હતું કે, તેઓ મુંબઈ પહોંચી ગયા છે. ત્યારબાદ પત્નીએ સંપર્ક કરવાનો પ્રયાસ કર્યો હતો. જોકે, રાકેશનો કોલ લાગ્યો ન હતો. 

પત્નીએ જણાવી સમગ્ર વાત

બીજા દિવસે એટલે કે 7 ઓગસ્ટના રોજ સવારે 8:30 વાગ્યે રાકેશને પત્નીએ કોલ કરતા જણાવ્યું હતું કે, હું ઠીક છું અને સુરત પહોંચી ગયો છું. ત્યારબાદ બપોરના ત્રણ વાગ્યા પછી પત્નીને કોલ કરીને જણાવ્યું હતું કે, આ ચારેય લોકો મારી પાસે 40 લાખ રૂપિયા માંગે છે તેઓને 40 લાખ રૂપિયા આપવા પડશે. તું ગમે તેમ કરીને 40 લાખ રૂપિયાની વ્યવસ્થા કરી સુરત આપી જા. રાકેશ ડરામણા અવાજે પત્ની સાથે ફોન પર વાત કરતો હતો.ત્યારબાદ એક કલાક પછી પત્નીએ રાકેશને કોલ કરીને પૂછ્યું હતું કે, કઈ વાતના 40 લાખ, એક દિવસમાં હું 40 લાખ ક્યાંથી લાવું? તમારી પાસે 40 લાખ રૂપિયા કોણ માગે છે? તેની સાથે વાત કરાવવાનું કહેતા જ ચાલુ ફોને હરીશ નામના વ્યક્તિએ વાત કરી હતી. હરીશે જણાવ્યું હતું કે, બેન ચાલીસ લાખ રૂપિયા તો ગમે તેમ કરીને આપવા જ પડશે. જેનાથી કંટાળીને યુવકે હોટલના બાથરૂમના રૂમની કૂદીને આપઘાત કરી લીધો. 

ડીંડોલી પોલીસે ગુનો નોંધીને તપાસ હાથ ધરી

આ સમગ્ર મામલે સુરત પોલીસએ ગુનો નોંધીને વધુ કાર્યવાહી હાથ ધરી છે. પ્રાથમિક તપાસમાં પોલીસને જાણકારી મળી છે કે, આ મામલો વેપારિક પૈસાની લેતી-દેતી બાબતનો છે. ચાર વેપારી વિરુદ્ધ તેની પત્નીએ ફરિયાદ આપતા સુરતના ડીંડોલી પોલીસે આપઘાતની ગુનો દાખલ કરી વધુ તપાસ શરૂ કરી છે. ઘટનાને પગલે મૃતક યુવકની પત્નીને બોલાવવામાં આવી હતી અને એની પત્ની આજે સુરત આવી પહોંચી હતી. યુવકની પત્નીએ છ લોકો પર આક્ષેપ કર્યા અને ન્યાયની માંગણી કરી હતી.  

(બાઈલાઇન: સંજયસિંહ રાઠોડ, સુરત)