સુરતના પરિયા ગામની ગૌચર જમીન જેટકોને ફાળવવા સામે ખેડૂતો-ગ્રામજનોનો વિરોધ

સંજયસિંહ રાઠોડ.સુરતઃ ગૌચરની જમીન જેટકો કંપનીને ફાળવી દેવાની તજવીજથી સુરતના ઓલપાડ વિસ્તારમાં આવેલા પરિયા ગામના લોકો લાલઘૂમ થયા છે. ગૌચરની જમીનને ફાળવવાની તૈયારીઓ સરકાર દ્વારા કરી દેવાઈ છે. આ મામલામાં ઉગ્ર વિરોધ નોંધાવવાની પણ તૈયારીઓ ગામના લોકોએ દર્શાવી છે. હાલમાં આ મામલે ગામના લોકો અને ખેડૂતો દ્વારા સુરતના જિલ્લા કલેક્ટરને આવેદન પત્ર આપવામાં આવ્યું છે.

ગૌચરની જમીનની માપણી પણ શરૂ થઈ ગઈ

સુરતના ઓલપાડ તાલુકાના પરિયા ગામની ગૌચરની જમીન જેટકો કંપનીને ફાળવવાની તૈયારી સરકારે કરી છે. પરિયા ગામની ગૌચરની જમીનની માપણીની શરૂઆત થતા ગ્રામજનો અને ખેડૂતો દ્વારા વિરોધ કરવામાં આવ્યો હતો. આ મામલે ગ્રામ સભામાં પણ વિરોધ સાથે ઠરાવ કરાયો છે. આજે ગ્રામજનોએ કાંગ્રેસ નેતા દર્શન નાયકની આગેવાનીમાં સુરતના જિલ્લા કલેકટરને આવેદનપત્ર આપ્યું હતું. દર્શન નાયકે જણાવ્યું હતું કે, જો ગૌચરની જમીન જેટકોને ફાળવવામાં આવશે તો ગામના લોકોને આંદોલન કરવાની ફરજ પડશે.