Stock Market Crash: કોરોનાને કારણે રોકાણકારોના 9 લાખ કરોડ રૂપિયા સ્વાહા…

નવી દિલ્હી : બુધવારે શેરબજારમાં થોડા જ કલાકોમાં રેકોર્ડ વધારો અને રેકોર્ડ ઘટાડો જોવા મળ્યો હતો. સેન્સેક્સ-નિફ્ટી ઓલ ટાઈમ હાઈ લેવલ પર પહોંચ્યા પછી તીવ્ર કડાકા સાથે નીચે પટકાયું હતું. આ મોટા ઘટાડાનું કારણ લાંબા સમય બાદ કોવિડ-19ના કેસમાં થયેલો વધારો માનવામાં આવે છે. 24 કલાકમાં 614 નવા કોવિડ-19 કેસોએ માત્ર લોકોને જ નહીં પરંતુ શેરબજારને પણ ડરાવી દીધા છે. તે જ સમયે, વિદેશી રોકાણકારો (FII) એ ભારતીય શેરબજારમાંથી મોટી રકમ પાછી ખેંચી હતી. દરમિયાન બુધવારે શેરબજારમાં રોકાણકારોને રૂ. 9.1 લાખ કરોડનું નુકસાન થયું હતું.

20 ડિસેમ્બરના રોજ, ટોચના 30 શેરનો સમાવેશ કરતો સેન્સેક્સ 931 પોઈન્ટ અથવા 1.30 ટકા ઘટીને 70,506 પર બંધ થયો હતો. જ્યારે NSE બેન્ચમાર્ક 303 પોઈન્ટ અથવા 1.41 ટકા ઘટીને 21,150 પર બંધ થયો હતો. સેન્સેક્સના 30માંથી 30 શેરોમાં ઘટાડો નોંધાયો હતો. જ્યારે ઓટો, મેટલ, બેન્ક નિફ્ટી અને સર્વિસિસ સહિત લગભગ તમામ સેક્ટરમાં વેચવાલી જોવા મળી હતી. આ મોટા ઘટાડાને કારણે BSE M-Cap ના આશરે રૂ. 9.1 લાખ કરોડનું નુકસાન થયું હતું. સેન્સેક્સના 3,921 શેરોમાંથી 3,178 શેરો ઘટ્યા અને 657 શેર વધ્યા, જ્યારે 86 શેરો યથાવત રહ્યા.

શેરબજારમાં શા માટે કડાકો થયો?

24 કલાકમાં કોવિડ-19 નવા વેરિયન્ટના 614 નવા કેસ નોંધાયા છે. જેણે શેરબજારને ડરાવી દીધું છે. તે જ સમયે, વિદેશી રોકાણકારોએ ભારતીય શેરબજારમાંથી રૂ. 600 કરોડથી વધુ પાછી ખેંચી લીધી. જેના કારણે શેરમાં ઝડપથી પ્રોફિટ બુકિંગ શરૂ થયું (સ્ટોક પ્રોફિટ બુક). જ્યારે સ્થાનિક સંસ્થાઓએ લગભગ રૂ. 294 કરોડની ખરીદી કરી હતી. આ સિવાય બેન્ક, મેટલ અને ઓટો શેરોમાં સૌથી વધુ ઘટાડાથી શેરબજાર દબાણમાં આવ્યું હતું.

શેરબજારમાં કડાકાના મુખ્ય ચાર કારણો

24 કલાકમાં કોવિડ-19ના 600 થી વધુ નવા કેસ.
વિદેશી રોકાણકારોએ ભારતીય શેરબજારમાંથી 600 કરોડ રૂપિયા પાછા ખેંચી લીધા.
બેંક, મેટલ અને ઓટો સેક્ટરમાં મોટો ઘટાડો.
વધતા બજારમાં સતત પ્રોફિટ બુકિંગ પણ તેનું કારણ હતું.

9.1 લાખ કરોડ ડૂબી ગયા

BSE M-Cap મુજબ, રોકાણકારોની સંપત્તિ અગાઉના સત્રમાં નોંધાયેલા રૂ. 359.11 લાખ કરોડના મૂલ્યાંકનની સરખામણીમાં રૂ. 9.11 લાખ કરોડ ઘટીને રૂ. 350.01 લાખ કરોડ થઈ હતી. રિલાયન્સ ઈન્ડસ્ટ્રીઝ, એલએન્ડટી, આઈસીઆઈસીઆઈ બેંક, ઈન્ફોસીસ, એસબીઆઈ અને એનટીપીસી જેવા ફ્રન્ટલાઈન શેરોમાં પણ મોટો ઘટાડો જોવા મળ્યો છે. સેન્સેક્સમાં આવેલા આ ઘટાડાને કારણે BSE પર 28 શેરો 52 સપ્તાહની નીચી સપાટીએ પહોંચી ગયા છે.

શેરબજાર નવી ટોચે પહોંચ્યું હતું

ઉલ્લેખનીય છે કે, બુધવારે બપોર સુધી વધારો ચાલુ રહ્યો હતો. શરૂઆતના વેપારમાં, સેન્સેક્સ લગભગ 450 પોઈન્ટ્સ વધ્યો હતો અને 71,913 ના નવા ઓલ-ટાઇમ હાઈ લેવલ પર પહોંચ્યો હતો. આવી જ હાલત નિફ્ટીની પણ હતી. જે શરૂઆતના ટ્રેડિંગમાં 21,593ની સપાટીએ પહોંચી ગયો હતો. જોકે, બાદમાં બંનેમાં રેકોર્ડ ઘટાડો નોંધાયો હતો.