FASTag, SBI ક્રેડિટ કાર્ડથી લઈને PF સુધી... 1 એપ્રિલથી બદલાશે પૈસા અને ટેક્સ સંબંધિત આ નિયમો

April New Rule 2024: આ નાણાકીય વર્ષ પૂરું થવામાં હવે ગણતરીના દિવસો જ બાકી છે. નવું નાણાકીય વર્ષ (New Financial Year 2024-25) 1 એપ્રિલથી શરૂ થશે. આ સાથે તેમાં ઘણા ફેરફારો પણ થશે. જેની સીધી અસર તમારા ખિસ્સા પર પડશે. નાણાકીય વર્ષ 2024-25 ની શરૂઆત પહેલા કેટલાક મહત્વપૂર્ણ કામ પૂર્ણ કરી લો, નહીંતર એપ્રિલ મહિનામાં નિયમોમાં ફેરફારને કારણે તમને મુશ્કેલીનો સામનો કરવો પડી શકે છે.

 NPS નિયમમાં થશે બદલે

નવા નાણાકીય વર્ષની શરૂઆતથી જ નેશનલ પેન્શન સિસ્ટમમાં ફેરફાર થઈ રહ્યા છે. પેન્શન ફંડ રેગ્યુલેટરે NPSની લોગિન પ્રક્રિયામાં ફેરફાર કરવાનો નિર્ણય લીધો છે. 1 એપ્રિલ, 2024 થી, નેશનલ પેન્શન સિસ્ટમ એકાઉન્ટમાં લોગિન કરવા માટે દ્વિ-પરિબળ પ્રમાણીકરણની જરૂર પડશે.

FASTag સંબંધિત નિયમ બદલાશે 

1લી એપ્રિલે FASTag સંબંધિત નિયમો પણ બદલાઈ રહ્યા છે. ગ્રાહકો માટે મહત્વપૂર્ણ છે કે જો તેઓએ તેમની કારના ફાસ્ટેગનું બેંક કેવાયસી પૂર્ણ કર્યું નથી, તો તેમને નવા નાણાકીય વર્ષમાં સમસ્યાઓનો સામનો કરવો પડી શકે છે. 31મી માર્ચ પહેલા KYC પૂર્ણ કરો. નહીંતર બેંક તમારા FASTag એકાઉન્ટને નિષ્ક્રિય અથવા બ્લેકલિસ્ટ કરી દેશે. જો આવું થાય, તો તમે તમારા FASTag એકાઉન્ટમાં બેલેન્સનો ઉપયોગ કરી શકશો નહીં.

EPFO ના ગ્રાહકોના હિતમાં મોટો નિર્ણય 

એમ્પ્લોઈઝ પ્રોવિડન્ટ ફંડ ઓર્ગેનાઈઝેશન પણ 1 એપ્રિલથી નવા નિયમો લાગુ કરવા જઈ રહ્યું છે. જે મુજબ નોકરી બદલવા પર પીએફ બેલેન્સ ટ્રાન્સફર કરવાની જરૂર નહીં પડે. જૂના પીએફનું બેલેન્સ ઓટો મોડમાં ટ્રાન્સફર કરવામાં આવશે. અત્યાર સુધી, નોકરી છોડ્યા પછી, યુનિવર્સલ એકાઉન્ટ નંબર હોવા છતાં, પીએફ ખાતામાંથી પૈસા ટ્રાન્સફર કરવા માટે પહેલા વિનંતી કરવી પડતી હતી.

Aadhaar-Pan Link ની છેલ્લી તારીખ

સરકારે પાન કાર્ડને આધાર કાર્ડ સાથે લિંક કરવાની સમયમર્યાદા ઘણી વખત લંબાવી છે. હવે આધાર-PAN લિંક કરવાની છેલ્લી તારીખ 31 માર્ચ 2024 છે. જો છેલ્લી તારીખ પહેલા લિંકિંગ કરવામાં ન આવે તો તમારું પાન કાર્ડ રદ થઈ શકે છે. PAN કાર્ડ રદ થયા બાદ ઘણી મહત્વની બાબતો શક્ય નહીં બને. એટલું જ નહીં, જો પાન કાર્ડ નિષ્ક્રિય થઈ જશે તો તેને એક્ટિવેટ કરવા માટે 1000 રૂપિયાનો દંડ પણ ભરવો પડશે.

LPG સિલિન્ડરના નવા ભાવ 

દર મહિનાની પહેલી તારીખે સરકાર LPG સિલિન્ડરના નવા ભાવ જાહેર કરે છે. દેશમાં લોકસભાની ચૂંટણી યોજાવા જઈ રહી છે, જેના કારણે આચારસંહિતા લાગુ થઈ ગઈ છે. તેને જોતા એલપીજી ગેસ સિલિન્ડરની કિંમતમાં ફેરફારની શક્યતા ઓછી છે.

SBI ક્રેડિટ કાર્ડના નિયમોમાં આ બદલાવ

1 એપ્રિલ 2024થી SBI ક્રેડિટ કાર્ડના નિયમોમાં પણ ફેરફાર થવા જઈ રહ્યા છે. ક્રેડિટ કાર્ડ દ્વારા ભાડાની ચુકવણી પર રિવોર્ડ પોઈન્ટ ઉપલબ્ધ રહેશે નહીં. આ નિયમ ઘણી બેંકોમાં 15 એપ્રિલથી લાગુ થઈ શકે છે.