Jioને ટક્કર આપવા Airtelએ લોન્ચ કર્યા ત્રણ 5G ડેટા બુસ્ટર પ્લાન્સ, જાણો બંને કંપનીના બેનિફિટ્સ

Airtel vs Jio 5G Data Booster: ભારતી એરટેલે તેના રિચાર્જ પ્લાનની કિંમતોમાં નોંધપાત્ર વધારો કર્યા બાદ કેટલાક નવા ડેટા બૂસ્ટર પ્લાન લોન્ચ કર્યા છે. આ 5G ડેટા બૂસ્ટર પ્લાન છે, જેના માટે ગ્રાહકોએ 51 થી 151 રૂપિયા સુધીનો ખર્ચ કરવો પડશે.

એરટેલે 3 ડેટા બૂસ્ટર પ્લાન લોન્ચ કર્યા છે. ચાલો તમને યાદ અપાવીએ કે Jio એ તેના રિચાર્જ પ્લાનની કિંમતમાં વધારો કર્યાના થોડા દિવસો બાદ નવા 5G ડેટા બૂસ્ટર પ્લાન પણ લૉન્ચ કર્યા હતા. ચાલો તમને એરટેલના નવા ડેટા બૂસ્ટર પ્લાન વિશે માહિતી આપીએ.

એરટેલે 3 ડેટા બૂસ્ટર પ્લાન લોન્ચ કર્યા

તેના રિચાર્જ પ્લાનની કિંમતમાં વધારો કરતી વખતે એરટેલે જાહેરાત કરી હતી કે જે યૂઝર્સને ઓછામાં ઓછા 2GB દૈનિક ડેટા અથવા વધુ દૈનિક ડેટા સાથેનો પ્લાન ખરીદ્યો છે તેઓ જ તેમના નેટવર્ક પર 5G સેવાનો લાભ મેળવી શકશે. જો યુઝર્સે આ મર્યાદા કરતા ઓછા દૈનિક ડેટા સાથેનો પ્લાન ખરીદ્યો છે, તો તેમને 5G સેવાની સુવિધા નહીં મળે.

હવે એરટેલે 5G ડેટા બૂસ્ટર પ્લાન લૉન્ચ કરીને આવા યૂઝર્સની સમસ્યાઓ હલ કરી છે, જેઓ દૈનિક 2GB ડેટાથી ઓછા ડેટા સાથે રિચાર્જ કરે છે, પરંતુ તેમ છતાં 5G સેવાનો ઉપયોગ કરવા માગે છે. એરટેલના આ નવા ડેટા બૂસ્ટર પ્લાન્સની મદદથી 1GB દૈનિક ડેટા અથવા 1.5GB દૈનિક ડેટા પ્લાન રિચાર્જ કરનારા યૂઝર્સને પણ વધારાના રૂ. 51, 101 અથવા 151ના 5G ડેટા બૂસ્ટર પ્લાનનું રિચાર્જ કરીને 5G સેવાનો લાભ મેળવી શકશે.

એટલું જ નહીં, એરટેલ આ 5G ડેટા બૂસ્ટર પ્લાન્સ સાથે તેના યુઝર્સને વધારાનો 4G ડેટા પણ આપી રહી છે. યૂઝર્સને રૂ. 51ના પ્લાન સાથે 3GB વધારાનો 4G ડેટા, રૂ. 101ના પ્લાન સાથે 6GB વધારાનો 4G ડેટા અને રૂ. 151ના પ્લાન સાથે 9GB વધારાનો 4G ડેટા મળશે. આ વધારાના ડેટા અને 5G ડેટા બૂસ્ટર પ્લાનની વેલિડિટી યુઝર્સના હાલના પ્લાનની માન્યતા સુધી રહેશે.

Jioના ડેટા બૂસ્ટર પ્લાન્સ

Jio એ થોડા અઠવાડિયા પહેલા તેના ત્રણ નવા 5G ડેટા બૂસ્ટર પ્લાન પણ લોન્ચ કર્યા હતા. તે ત્રણ પ્લાનની કિંમત પણ 51, 101 અને 151 રૂપિયા છે. જોકે, Jioના આ પ્લાનની શરતો થોડી અલગ છે.

Jioનો રૂ. 51 ડેટા બૂસ્ટર પ્લાન: 1.5GB દૈનિક ડેટા પ્લાનનો ઉપયોગ કરતા યુઝર્સ રૂ. 51નો ડેટા બૂસ્ટર પ્લાન લઈ શકે છે, જેમાં તેમને દૈનિક 5G ડેટા સાથે 3GB વધારાનો 4G ડેટા મળે છે.

Jioનો રૂ. 101 ડેટા બૂસ્ટર પ્લાન: 1.5GB પ્રતિ દિવસ અથવા 1GB પ્રતિ દિવસ ડેટા પ્લાનનો ઉપયોગ કરનારા વપરાશકર્તાઓ રૂ. 101 ડેટા બૂસ્ટર પ્લાન લઈ શકે છે, જેમાં તેઓને દૈનિક 5G ડેટા સાથે 6GB વધારાનો 4G ડેટા મળે છે.

Jioનો રૂ. 151 ડેટા બૂસ્ટર પ્લાનઃ 1.5GB પ્રતિ દિવસ અથવા 1GB પ્રતિ દિવસ ડેટા પ્લાનનો ઉપયોગ કરતા યુઝર્સ રૂ. 151 ડેટા બૂસ્ટર પ્લાન લઈ શકે છે, જેમાં તેમને દૈનિક 5G ડેટા સાથે 9GB વધારાનો 4G ડેટા મળે છે.