અદાણીની મુશ્કેલી ફરી વધી, હવે અમેરિકામાં તપાસ શરૂ… મોટા રોકાણકારોની પૂછપરછ!

નવી દિલ્હી: શુક્રવારે અદાણી ગ્રુપની કંપનીઓના શેરમાં મોટો ઘટાડો જોવા મળ્યો હતો. તેની પાછળનું કારણ જણાવવામાં આવી રહ્યું છે કે અમેરિકામાં તપાસ ચાલી રહી છે. અમેરિકન ફર્મ હિંડનબર્ગ રિસર્ચે અદાણી ગ્રુપ પર સ્ટોક મેનીપ્યુલેશન અને એકાઉન્ટિંગ ફ્રોડનો આરોપ લગાવ્યો હતો. અદાણી ગ્રુપે રોકાણકારોનો વિશ્વાસ જીતવા માટે રોડ શો કર્યો અને રોકાણકારો સાથે વાતચીત કરી. બ્લૂમબર્ગના અહેવાલમાં જણાવાયું છે કે યુએસમાં સિક્યોરિટીઝ એન્ડ એક્સચેન્જ કમિશન તેની તપાસ કરી રહ્યું છે.

રોકાણકારોની  પૂછપરછ
યુએસ સિક્યોરિટીઝ એન્ડ એક્સચેન્જ કમિશને અદાણી ગ્રુપના મુખ્ય શેરધારકોને પૂછ્યું છે કે તેમની ગ્રુપ સાથે શું વાતચીત થઈ છે. આ વર્ષના જાન્યુઆરી મહિનામાં હિંડનબર્ગે તેના અહેવાલમાં અદાણી ગ્રુપની કંપનીઓ પર શેરના ભાવમાં ચેડાં કરવાનો આરોપ મૂક્યો હતો.

હિંડનબર્ગે તેમની કંપનીઓમાં કહ્યું હતું કે અદાણી ગ્રુપે શેરના ભાવમાં ફેરફાર કરવા માટે ઓફશોર કંપનીઓનો ઉપયોગ કર્યો હતો. આ સાથે રિસર્ચ ફર્મે અદાણી ગ્રુપના ઊંચા દેવા અંગે પણ ચિંતા વ્યક્ત કરી હતી.હિંડનબર્ગના રિપોર્ટ બાદ અદાણી ગ્રુપની કંપનીઓના શેરમાં ભારે ઘટાડો થયો હતો અને રોકાણકારોએ 11 બિલિયન ડોલરની સંપત્તિ ગુમાવી હતી.

ભારતમાં અદાણી ગ્રુપ તપાસ હેઠળ  
બ્લૂમબર્ગના અહેવાલમાં સૂત્રોના હવાલાથી કહેવામાં આવ્યું છે કે અદાણી ગ્રુપમાં મોટો હિસ્સો ધરાવતા સંસ્થાકીય રોકાણકારોને બ્રુકલિનમાં એટર્ની ઓફિસ અને એસઈસી દ્વારા અદાણી ગ્રુપે અમેરિકી રોકાણકારોને શું કહ્યું છે તે સમજાવવા જણાવ્યું છે. અન્ય બે લોકોએ બ્લૂમબર્ગને જણાવ્યું કે SEC એ પણ તાજેતરના મહિનાઓમાં સમાન તપાસ શરૂ કરી છે. અદાણી  ગ્રુપના પ્રવક્તાએ બ્લૂમબર્ગને જણાવ્યું હતું કે તે રોકાણકારોને કોઈ સમન્સ વિશે જાણતું નથી. ગૌતમ અદાણીની આગેવાની હેઠળનું અદાણી ગ્રુપ ભારતમાં પહેલેથી જ નિયમનકારી તપાસ હેઠળ છે.

અદાણી ગ્રુપની કંપનીઓના શેર તૂટ્યા
તપાસના સમાચાર બાદ અદાણી એન્ટરપ્રાઇઝ લિમિટેડના શેરમાં ભારે વેચવાલી જોવા મળી હતી. સળંગ ત્રીજા સત્રમાં શેરમાં ઘટાડો થયો હતો. શેર તેના અગાઉના રૂ. 2,395.90ના બંધ સ્તરની સામે આજે રૂ. 9.73 ટકા ઘટીને રૂ.2,162.85ની નીચી સપાટીએ પહોંચ્યો હતો.

શુક્રવારે સવારે 11 વાગ્યે અદાણી એન્ટરપ્રાઈઝના શેર 8.92 ટકાના ઘટાડા સાથે રૂ. 2,182.10 પર ટ્રેડ થઈ રહ્યા હતા. અદાણી પોર્ટ્સ 4.8 ટકા ઘટીને રૂ. 709.75 થયો હતો. અદાણી પાવર 5.12 ટકા ઘટીને રૂ. 243.65 થયો હતો. અદાણી ટ્રાન્સમિશન 6.88 ટકા ઘટીને રૂ. 749.50 પર અને અદાણી ગ્રીન એનર્જી 2.6 ટકા ઘટીને રૂ. 948.75 પર ટ્રેડ કરી રહી હતી. અદાણી ટોટલ ગેસ 3.47 ટકાના ઘટાડા સાથે રૂ. 632.40 પર ટ્રેડ કરી રહ્યો હતો. અદાણી વિલ્મર 2.98 ટકા ઘટીને રૂ. 405.90 થયો હતો.