ગુજરાત યુનિવર્સિટીના ક્વાર્ટરમાં સિક્યોરિટી ગાર્ડ અને પોલીસકર્મી દારૂ પીને મદમસ્ત થઈને નાચ્યા

દારૂના નશામાં મદમસ્ત થઈને પોલીસકર્મીએ ડાંસ કર્યો
એકબાજુ તાજેતરમાં ગુજરાત યુનિવર્સિટીમાં એનિમેશન વિભાગમાં એસી ચોરી થયાની ઘટના સામે આવી હતી. ત્યારે હવે યુનિવર્સિટીના કાયમી સિક્યોરિટી ગાર્ડ જ આ રીતે પોલીસ કર્મચારી સાથે દારૂ પીતા જોવા મળતા અનેક સવાલો ઉઠી રહ્યા છે. યુનિવર્સિટીમાં કાયમી કર્મચારીઓને રહેવા માટે ક્વાર્ટરની ફાળવણી કરવામાં આવે છે. ત્યારે GMDC પાસે આવેલા સરકારી ક્વાટર્સમાં રહેતા સિક્યોરિટી ગાર્ડની દારૂની મહેફિલનો વીડિયો હવે સામે આવ્યો છે.

સ્પેશ્યલ બ્રાન્ચમાં ફરજ બજાવે છે પોલીસકર્મી
આ મહેફિલમાં યુનિવર્સિટીના સરકારી કર્મચારીની સાથે પોલીસ વિભાગમાં સ્પેશ્યલ બ્રાન્ચમાં ફરજ બજાવતા પોલીસકર્મી ઈશ્વરભાઈ પણ દેખાય છે. બંને કર્મચારીઓ દારૂના નશામાં મદમસ્ત થઈને નાચી રહ્યા છે. ત્યારે જોવાનું રહેશે કે પોલીસકર્મી અને ગુજરાત યુનિવર્સિટીના કર્મચારીનો દારૂનો વીડિયો વાઈરલ થયા બાદ પોલીસ દ્વારા કોઈ કાર્યવાહી કરવામાં આવે છે કે નહીં.